மதுர குலுங்க குலுங்க.. கொடியேற்றத்துடன் தொடங்கியது மதுரை சித்திரை திருவிழா!

பார்வதி தேவியின் அவதாரமான மீனாட்சி, மதுரை பாண்டிய மன்னனுக்கு மகளாக பிறந்து, பட்டத்து அரசியாக மகுடம் சூடி, தேவா்களை போரில் வென்று, கடைசியாக சிவபெருமானை மணம் முடித்ததாக வரலாறு கூறுகிறது. இதனால் இந்த கோயிலில் மீனாட்சிக்கே சிறப்புண்டு.

அந்த வகையில் இந்த சித்திரை பெருவிழா தற்போது கொடியேற்றத்துடன் கோலாகலமாக தொடங்கியது. இன்று ஏப்ரல் 29 முதல் மே 10 வரை மீனாட்சி அம்மன் கோவில் விழாக்களும், மே 8 முதல் 17 வரை அழகர்கோவில் விழாக்களும் நடைபெறும். காலை 10:35 மணியிலிருந்து 10:59 மணிக்குள் சுவாமி சன்னதி முன்புள்ள கம்பத்தடி மண்டபத்தில் தங்க கொடி மரத்தில் வேத மந்திரங்கள் முழங்க கொடியேற்றப்பட்டது.

இதனை தொடர்ந்து இன்று முதல் தினமும் பல்வேறு வாகனங்களில் மீனாட்சி - சொக்கநாதர் வீதியுலா நடைபெறும். அந்த வகையில், மே 6ஆம் தேதி மீனாட்சி பட்டாபிஷேகமும், மே 8ஆம் தேதி மீனாட்சி திருக்கல்யாணமும், மே 9ஆம் தேதி திருத்தேரோட்டமும் நடைபெறும். இதே போன்று மே 11 ஆம் தேதி கள்ளழகர் எதிர்சேவையும், மே 12ஆம் தேதி கள்ளழகர் வைகை ஆற்றில் எழுந்தருளும் நிகழ்வும் நடைபெறுகின்றன. இந்த பெருந்திருவிழா தொடங்கியதையடுத்து மதுரை மக்கள் கொண்டாட்டத்தை தொடங்கியுள்ளனர்.