Home /trichy /

3 தலைமுறைகளாக வெளிச்சத்தை எதிர்நோக்கி காத்திருக்கும் ஏழை குடும்பங்கள்.. 60 ஆண்டுகால துயரம்..

3 தலைமுறைகளாக வெளிச்சத்தை எதிர்நோக்கி காத்திருக்கும் ஏழை குடும்பங்கள்.. 60 ஆண்டுகால துயரம்..

மின்சார

மின்சார வசதியின்றி வாழும் மக்கள்

Trichy District: திருச்சியில் 60 வருடங்களாக மின்சாரம் அடிப்படை வசதி இல்லாமல் வசித்துவரும் மக்கள் பற்றிய செய்தி தொகுப்பு..

    திருச்சி மாவட்டம் உறையூர் பகுதி காவல்காரன் தெருவை சேர்ந்த 16 குடும்பங்கள் மின்சார வசதியின்றி கிட்டத்தட்ட 60 ஆண்டுகளாக வாழ்ந்து வருகின்றனர். இதுகுறித்து அப்பகுதிக்குச் சென்று அங்கு வாழும் மக்களிடம் கேட்டபோது கண்ணீர் மல்க தங்களது வாழ்க்கை நடைமுறைகளை கூறினார்கள்.

    தினந்தோறும் தினக்கூலி சென்று அன்றாட பொழப்பை நடத்தி வருவதாகவும் குறிப்பாக அம்மிக்கல் உரல் போன்ற பொருட்களை சேதம் அடைந்து இருந்தால் அவற்றை சரி செய்யும் பணி தான் எங்களுடைய குலத்தொழில் ஆகும் .காலம் மாற்றம் ஏற்ப அத்தகைய பொருளை பயன்படுத்துவது மிக மிக அரிதாக மாறியுள்ளது இருந்தபோதிலும் தெருத்தெருவாக சென்று உணவின்றி தூக்கமின்றி எங்கள் தொழிலை செய்து வருகிறோம் என்று கண்ணீர் மல்க தெரிவித்தனர்.

    எங்களுடைய தாத்தா காலத்திலிருந்தே மின்சாரம் இல்லாமலும் கழிவறைகள் இல்லாமலும் அடிப்படை வசதி ஏதும் இல்லாமல் எங்களுடைய பிழைப்பை காலம் போன போக்கில் ஓட்டி வருகிறோம் என்றனர்.

    எங்களுடைய வாழ்க்கை முறையைப் பார்த்து உதவ வேண்டும் என்ற ஒரு எண்ணம் திருச்சியின் முதல் கலெக்டராக பொறுப்பேற்ற மலையப்பன் அவர்கள்தான் எங்களுக்கு தெய்வமாக நின்று இந்த இடத்தில் வீடு கட்டுவதற்கு அனுமதி அளித்தார். பின்பு வீடு கட்டுவதற்கும் எங்களிடம் பண வசதி இல்லாததை அறிந்து கொண்ட சில தனியார் தொண்டு நிறுவனங்கள் எங்களுக்கு வீடு கட்டிக் கொடுத்தார்கள். அதை தொடர்ந்து மூன்று தலைமுறைகளாக இந்த பகுதியில்தான் வசித்து வருகிறோம்.  ஆதார், பான் கார்டு, வாக்காளர் அடையாள அட்டை, ரேஷன்கார்டு போன்ற அனைத்து  ஆவணங்களையும்  எங்களுக்கு அரசாங்கம் வழங்கியுள்ளது.

    நாங்கள் குடியிருக்கும் பகுதியில் எங்களுக்கு தேவையான அடிப்படை வசதிகள் எதையும்  மாவட்ட நிர்வாகம் செய்து தரவில்லை. மூன்று தலைமுறைகளாக கோரிக்கை வைத்தும் இதுவரை எங்கள் கோரிக்கையை ஏற்றுக் கொள்ள எந்த அரசு அதிகாரிகளும் முன்வரவில்லை. நாங்கள் அரசின் சலுகைகள் அனைத்தும் எங்களுக்குத் தர வேண்டும் என கோரிக்கையை முன்வைக்கவில்லை நாங்கள் குடியிருக்கும் வீடுகளில்  மின்சாரம் வழங்க வேண்டும் என்பதே எங்களுடைய முக்கிய கோரிக்கையாக உள்ளது .

    தினக்கூலிகளாக இருந்தாலும் சுயமரியாதையுடன் வாழ வேண்டும் என்பதற்காக தான் நாங்கள் தெருத்தெருவாக அலைந்து கூலிவேலை செய்து எங்களுடைய பிள்ளைகளை வளர்த்து வருகிறோம்.
    நாங்கள் எங்களது முன்னோர்கள் என யாரும் படிப்பறிவு இல்லாமல் குலத் தொழிலை மட்டுமே செய்து வருகிறோம்.  எங்களது பிள்ளைகளாவது படித்து இந்த சமுதாயத்தில் நல்ல நிலைமைக்கு வர வேண்டும் என்ற நோக்கத்தோடு பள்ளியில் சேர்த்து படிக்க வைத்து வருகிறோம். ஆனால் எங்களது பிள்ளைகளுக்கு அடிப்படை வசதிகளான கழிவறையும், மின்சாரமும் இல்லை.  எங்கள் பிள்ளைகள், அதிலும் குறிப்பாக பெண் பிள்ளைகள் இந்தப் பகுதிகளில் கழிவறைக்கு செல்ல வேண்டுமென்றால் மிகவும் சிரமப்பட்டு, அவதிப்பட்டு தான் செல்கிறார்கள்.

    எங்களை ஏன் என்று கேட்க ஒரு நாதியும் இல்லை. எங்களுக்கு ஆதரவு அளிக்கவும் எவரும் இல்லை. ஒரு அனாதை போன்று இங்கு வாழ்ந்து வருகிறோம்.

    மேலும் இதுகுறித்து அப்பகுதி இருக்கும் சிறுமியிடம் கேட்டபோது எனக்கு விவரம் தெரிந்த நாள் முதல் மின்சார விளக்கில் நாங்கள் படித்ததும் இல்லை மின்விசிறியில் தூங்குவதுமில்லை தினந்தோறும் பள்ளிக்கு செல்லும்போது வீட்டுப்பாடங்களை செய்ய முடியாத சூழ்நிலையும் ஆசிரியர்கள் எங்களை திட்டுவதும் வழக்கமாக நடந்து வருகிறது .எங்களுடைய கஷ்டத்தை பார்த்து வாரம் வாரம் மாவட்ட ஆட்சியர் அலுவலகம் சென்று எங்களது பெற்றோர்கள் மனு கொடுத்து தான் வருகிறார்கள் .

    இதுவரை எந்த அதிகாரியும் நடவடிக்கை எடுக்கவில்லை எங்களுக்கு மின்சாரம் வழங்க இந்த அரசாங்கம் உதவி செய்ய வேண்டும் என கோரிக்கை வைத்துள்ளார் சிறுமி.

    அப்பகுதியில் பத்துக்கும் மேற்பட்ட சிறுமிகள் வயதிற்கு வந்து பள்ளி படித்து வருகிறார்கள் இந்த சமுதாயத்தில் நாங்களும் ஒரு அங்கீகாரம் பெற வேண்டும் எங்களது பெற்றோர்களை நல்ல முறையில் பாதுகாக்க வேண்டும் . என்பதற்காகவே நாங்கள் அரும்பாடுபட்டு படித்து வருகிறோம். படிப்பதற்கு கூட மின்சாரம் இல்லாமல் இந்தப் பகுதியில் வாழ்ந்து வருவது மிகவும் வேதனை கூறியதாக உள்ளது குறிப்பாக மழைக்காலங்களில் இப்பகுதிகளில் சாக்கடை நீரும் கழிவு நீரும் கலந்து வீட்டுக்குள் வருவதாலும் பீடி மிகவும் சேதம் அடைந்துள்ளதால் மழைக்காலங்களில் வீட்டில் உறங்குவதே மிகக் கடினமான ஏதோ ஒரு மூலையில் அமர்ந்துகொண்டு மழை நிற்கும் வரை காத்திருப்போம் துர்நாற்றம் வீசுவதையும் பொருட்படுத்தாமல் எங்களது வாழ்க்கையை இப்படி தான் கழித்து வருகிறோம் என அந்த சிறுமி தெரிவித்தார்.

    ஒவ்வொரு தேர்தலிலும் வாக்குறுதியில் கொடுத்து வாக்கு சேகரிக்க வரும் அனைவரையும் நாங்கள் வைக்கும் ஒரே கோரிக்கை மின்சாரம் வழங்க ஏற்பாடு செய்ய வேண்டும் என்பதே.  நாங்கள் வெற்றி பெற்றால் நிச்சயமாக நிறைவேற்றுவோம் என வாக்குறுதி கொடுக்கிறார்கள் ஆனால் வெற்றி பெற்ற பிறகு எங்களை யாரும் கண்டு கொள்வதில்லை குறிப்பாக இந்தப் பகுதியில் 16 குடும்பங்கள் நாங்கள் அவதிப்பட்டு வருகிறோம் அருகில் உள்ளவர்கள் கூட எங்களுக்கு உதவி செய்ய யோசனை செய்து வருகிறார்கள். அதற்கு ஒரு காரணம் நாங்கள் தாழ்த்தப்பட்டவர்கள் என்பதாலேயே. இந்த உலகில் நாங்கள் பிறந்தது தவறா இல்லை எங்களது பிள்ளைகளை இந்த சமுதாயத்தில் நல்ல நிலைமைக்கு கொண்டு வர வேண்டுமென்று கூலி வேலை செய்து சுயமரியாதையுடன் வாழ்வது தவறா என்று எங்களுக்கு தெரியவில்லை இந்த  அரசாங்கம் எங்களுடைய வாழ்வில் ஒளி விளக்கை ஏற்றி வைக்கும் என்ற ஒரு எதிர்பார்ப்புடன் காலங்களைக் கடந்து வருகிறோம்.” என்றனர் அப்பகுதி மக்கள்.

    செய்தியாளர் - என்.மணிகண்டன்.
    Published by:Arun
    First published:

    Tags: Trichy

    அடுத்த செய்தி