Home /trichy /

Trichy : திருச்சியில் வாழ்ந்த தமிழ் சினிமாவின் முதல் சூப்பர் ஸ்டார் தியாகராஜ பாகவதர்.. இப்படி ஒரு சோக வரலாறு...!!

Trichy : திருச்சியில் வாழ்ந்த தமிழ் சினிமாவின் முதல் சூப்பர் ஸ்டார் தியாகராஜ பாகவதர்.. இப்படி ஒரு சோக வரலாறு...!!

தியாகராஜ

தியாகராஜ பாகவதர்

M. K. Thyagaraja Bhagavathar : தமிழ் திரையுலகின் முதல் சூப்பர் ஸ்டாராக விளங்கிய தியாகராஜ பாகவதரின் உடல் நல்லடக்கம் செய்யப்பட்டது திருச்சியில் தான். அவருக்கும் திருச்சிகுமான தொடர்பை விவரிக்கிறது இந்த செய்தி தொகுப்பு..

    தமிழ்த் திரைப்படத் துறையில் சூப்பர் ஸ்டார் அந்தஸ்தில் இருந்தவர், பொதுவாழ்க்கையில் சிறந்த மனிதராக வாழ்ந்து காட்டியவர் தியாகராஜ பாகவதர். சுருக்கமாக எம்.கே.டி. என அழைக்கப்படும் தியாகராஜ பாகவதர் மார்ச் 1, 1910 ஆம் ஆண்டு பிறந்தார்.

    இவரது பெற்றோர் கிருஷ்ணமூர்த்திஆச்சாரி - மாணிக்கத்தம்மாள் ஆவார்கள்.  சில ஆண்டுகளுக்கு பிறகு தியாகராஜ பாகவதரின் குடும்பம் திருச்சிக்கு குடிபெயர்ந்தனர்.  தனது சிறுவயதிலில் இருந்து நடிப்பின் மீது ஆர்வம் கொண்ட பாகவதர் பல்வேறு மேடை நாடகங்களில் நடித்தார். இவரின் நடிப்பாற்றலை பார்த்த சிலர் திரையுலகத்தில் அறிமுகம் செய்து வைத்தனர்.

    இதனை தொடர்ந்து 1934 ஆம் ஆண்டு பவளக்கொடி என்கிற திரைப்படத்தின் மூலம் கதாநாயகனாக அறிமுகமாகிய இவர், 14 தமிழ்த் திரைப்படங்களில் நடித்தார், அதில் 6 படங்கள் வெற்றிப் படங்களாகும். தியாகராஜ பாகவதரின் இசையை செல்வந்தர் முதல் பாமரர்கள் வரை அனைவரும் பாகுபாடின்றி ரசித்தனர். இவரின் திரைப்பாடல்கள் பெரும்பாலும் இறைப்பற்றுடனும், தென்னிந்திய பாரம்பரிய இசையை சார்ந்தே இருக்கும். இவர் நடிக்கும் திரைப்படங்களுக்கு பாடலெழுதும் ஆஸ்தான பாடலாசிரியரான பாபநாசம் சிவன், இவருக்கென தனித்துவமான பாடல்களை இயற்றுவதில் வல்லவராய் இருந்தார்.

    புகழின் உச்சத்தில் இருந்தது அவரின் வாழ்க்கை. சில சதிகளிலும் சிக்கிக் கொண்டார்.. சென்னையில் மிகப் பரபரப்பாக பேசப்பட்ட லட்சுமிகாந்தன் கொலை வழக்கில் பாகவதர் மற்றும் அவரின் திரையுலக ஆத்ம தோழரான என்.எஸ்.கிருஷ்ணன் உடன் கைது செய்யப்பட்டார். 4 வருடம் சிறைத் தண்டனையும் பெற்றார்.

    தண்டனை காலத்திலேய இவரின் வழக்கு மறு விசாரணைக்கு எடுத்துக்கொள்ளப்பட்டது. 1948-ல் இருவரும் குற்றமற்றவர்கள் என நிருப்பிக்கபட்டதின் அடிப்படையில் அவர் விடுதலையானார். சிறைக்கு சென்று வந்தது அவரது வாழ்க்கையில், சினிமா உச்சத்தை பொளாதார ரீதியாக பாதித்தது. பாகவதர் சிறை செல்ல நேர்ந்தபோது 12 படங்களுக்கு முன்பணம் வாங்கி இருந்தார்.

    படத் தயாரிப்பாளர்கள் கொடுத்த முன் பணத்தை திருப்பிக் கேட்டார்கள். அந்த சிரமமான நேரத்திலும் அந்தப் பணத்தையெல்லாம் மிகுந்த சிரத்தையோடு திருப்பிக் கொடுத்தார். பிறகு அவர் நடித்த திரைப்படங்கள் எதிர்பார்த்த வெற்றியை பெறவில்லை. சிறைக்குப்பின் பலர் படமெடுக்க முன்வந்தாலும் பாகவதர் அவற்றை ஒதுக்கிவிட்டார். அவர் பெரிதும் விரும்பிய சினிமாத்துறை தனது கஷ்ட காலத்தில் உதவாதநிலையில் வெறுத்து ஒதுக்கினார்.

    மேலும் யாரையும் நம்பாமல் அவர் சொந்தப் படங்கள் எடுக்க தொடங்கினார்.. ஆனால் அதுவும் தோல்வியில் முடிந்தது. இவரின் நண்பர்கள் பல உதவி செய்ய முன்வந்தாலும் அவற்றை  மறுத்துவிட்டார். பலருக்கு உதவி செய்வதில் பாகவதர் தயாள குணம் கொண்டவர். சேமிப்பு குணம் அற்றவர். படங்களில் இருந்து ஒய்வு பெற்ற சமயத்தில் தன்னையே நம்பி இருந்த பாடலாசிரியர் பாபநாசம் சிவனுக்கு ஏற்பட்ட பொருளாதார சிக்கலை உணர்ந்து, அவர் கேட்காமலேயே தான் சாப்பிடுவதற்கும், விருந்தினர்களை உபசரிக்கவும் பயன்படுத்தும் தங்கதட்டையே கொடுத்து உதயவர். தனது வழக்கை சிக்கலின்றி முடித்து வைத்த வழக்கறிஞர் எத்திராஜிக்கு ஒரு தங்கத்தட்டை அளித்து பெருமைப்படுத்தியவர். வழக்கறிஞர் எத்திராஜ் இந்த தங்கத் தட்டையும் தன்னிடமிருந்த பணத்தையும் வைத்து 1948ஆம் ஆண்டு சென்னையில் எத்திராஜ் மகளிர் கல்லூரியை ஆரம்பித்தார்.

    இப்படி உதவிய பாகவதர் குடும்பம் மிகப் பெரிய பொருளாதார இக்கட்டையும் சந்தித்தது. இன்றைய பல ஜாம்பவான்கள் அனைவரும் வந்து காத்திருந்த அவரது வீட்டில் வறுமை தாண்டவமாடியது. பாகவதரின் கடைசி காலம் மிகவும் சோகமானது. வீட்டு வாடகைகூட கொடுக்க முடியாத சூழ்நிலைக்கு அவர் தள்ளப்பட்டார். மருத்துவத்திற்காகக்கூட யாருடைய தயவையும் அவர் நாடவில்லை. பல திரைக்கலைஞர்கள் விழா எடுத்து நிதி திரட்டும் ஆலோசனையைக் கூறியும் அதை ஏற்க மறுத்து விட்டார்.

    நவம்பர் 1, 1959, இதய நோயினால் பாதிப்படைந்தவராக சென்னை பொதுமருத்துமனையில் சேர்க்கப்பட்டு சிகிச்சை பலனளிக்காமல் அங்கு காலமானார். பின்பு பாகதவர் உடலை அவர் வாழ்ந்த ஊரான திருச்சிக்கு கொண்டுவந்தனர். பின்பு பாகதவருக்கு பெருமை சேர்க்கும் விதமாக திருச்சி மாவட்ட விஸ்வகர்மா சங்கத்தினர்அவரின் பெற்றோர்கள் நினைவிடத்தின் அருகிலியே அவரது உடலை நல்லடக்கம் செய்தனர். இந்த நினைவிடத்தை இன்றளவும் பராமரிக்கபட்டு வருகிறது.

    செய்தியாளர் -என்.மணிகண்டன்.
    Published by:Arun
    First published:

    Tags: Cinema, Tamil Cinema, Trichy

    அடுத்த செய்தி