திருச்சி ஸ்ரீ ஏகிரி அம்மன் கோவிலில் சித்திரை பெருவிழா - குதிரை ஏறும் நிகழ்வால் பரவசமான பக்தர்கள்..!

திருச்சி அருகே அதவத்தூரில்  ஸ்ரீ ஏகிரி அம்மன், பனையடி கருப்பசாமி கோவில் சித்திரை பெருந்திருவிழா நடந்துக் கொண்டிருக்கிறது. இந்த விழாவின் முக்கிய நிகழ்வான பெரிய பட்டையார் குதிரை ஏறி வரும் நிகழ்வு, மற்றும் ஆட்டுத் தலையை ஈட்டியால் குத்தும் தலை குத்தி படுகளம் நிகழ்ச்சி நேற்று சிறப்பாக நடைபெற்றது.

திருச்சி மாவட்டம் வயலூர் அருகே அதவத்தூரில்  பழமை வாய்ந்த ஸ்ரீ ஏகிரி அம்மன், பனையடி கருப்பு, தேரடி கருப்பு, கருவை அய்யனார், சாம்புவன் கோவில் அமைந்துள்ளது. பிரசித்தி பெற்ற ஏகிரியம்மன், பனையடி கருப்பு சித்திரை பெருந்திருவிழா 18 ஆண்டுகளுக்குப் பிறகு ஏப்ரல் 18ஆம் தேதி காப்பு கட்டுதலுடன் துவங்கியது.

தினந்தோறும் ஏகிரியம்மன், பனையடி கருப்பசாமி சுவாமி உற்சவர்கள் மயில்,  குதிரை, சிங்கம், ரிஷபம், பூத, யானை வாகனங்களில் திருவீதி உலா வந்தனர். அதனை தொடர்ந்து மே 4 ம் தேதி முதல் மே 8 தேதி வரை அதவத்தூர், பள்ளக்காடு, மேலப்பேட்டை, பாளையம், கொய்யாதோப்பு, தப்புகொட்டிக்காடு உள்ளிட்ட பகுதிகளில் சுவாமி உற்சவர் திருவீதி உலா மற்றும் கிடா வெட்டு பூஜைகள் நடைபெற்றன.

சித்திரை பெருந்திரு விழாவின் 21ம் நாள் நிகழ்ச்சியாக கருவை அய்யனார், பனையடி கருப்பசாமி கோவிலில் பொங்கலிட்டு சிறப்பு பூஜைகள் செய்த பின்னர் பெரிய பட்டையதார் குதிரை ஏறி அதவத்தூர், மேலபேட்டை வீதிகளில் மேளதாளங்கள் முழங்க பொதுமக்கள் படைசூழ ஊர்வலமாக வந்தனர்.

மேலும் படிக்க... தேனியில் தொடங்கியது வீரபாண்டி திருவிழா.. பக்தர்கள் பரவசம்!

அதவத்தூர் சாவடி திடலில் இருந்து ஆட்டு தலையினை இளைஞர்கள் ஈட்டியால் குத்தும் தலை குத்தி படுகளம் நிகழ்ச்சியும் நடைபெற்றது. அதவத்தூர் சவாடி திடலில் துவங்கி மேலப்பேட்டை வரை சென்று மீண்டும் அதவத்தூர் சவாடி திடலில் பெரிய பட்டையதார் குதிரை ஏறி வரும் நிகழ்வு மற்றும் தலை குத்தி படுகளம் நிகழ்ச்சி நிறைவடைந்தது.

செய்தியாளர்: சே.கோவிந்தராஜ்,திருச்சி