தேனி : வரத்து குறைவு - தர்பூசணி கிலோ எவ்வளவு தெரியுமா?

கோடை காலம் நெருங்கி வரும் நிலையில் தேனி மாவட்டம் முழுவதிலும் தர்பூசணி விற்பனை சூடு பிடிக்க ஆரம்பித்துள்ளது.

கோடைக்காலம் :-

கோடை காலங்களில் இயல்பாகவே தட்ப வெப்ப நிலை அதிகமாக இருப்பதால், மக்கள் அதிகம் தர்பூசணி, இளநீர், குளிர்பானங்கள் போன்றவற்றை பயன்படுத்த தொடங்குவதால் இவற்றின் விற்பனை அதிகரிக்கும்.

ஏப்ரல் மே மாதங்களில் நிலவும் அக்னி நட்சத்திரம் வேளையில் கடுமையான வெப்பக்காற்று மிகுந்த வானிலை 10 முதல் 20 நாட்கள் வரை நீடிக்கும்.

இந்த சமயத்தில் தர்பூசணி மற்றும் இதர நீர் பழங்களின் விற்பனை அதிகரித்தாலும் தற்போதே தேனி மாவட்டத்தில் தர்பூசணி விற்பனை அதிகரிக்கத் தொடங்கியுள்ளது.

ஏப்ரல், மே மாதங்களுக்கு முன்பே பிப்ரவரி (தற்போது )மாதத்தில் வெயிலின் தாக்கம் அதிகமாக இருப்பதால், மதிய வேளைகளில் கடுமையான வெப்பநிலை நிலவுகிறது.

இதனால் தேனி மாவட்டத்தில் கம்பம் சின்னமனூர், கூடலூர் மற்றும் மாவட்டம் முழுவதிலும் உள்ள பல பகுதிகளில் தர்பூசணி விற்பனை அதிகரிக்கத் தொடங்கி உள்ளதால், தர்பூசணி வியாபாரிகள் சாலை ஓரங்களில் கடைகளை போட்டு வியாபாரம் நடத்தி வருகின்றனர்.

தர்பூசணி வியாபாரம் :-

தர்பூசணி வியாபாரிகள் திண்டிவனம் மற்றும் விழுப்புரம் மாவட்டங்களில் இருந்து தர்பூசணி இறக்குமதி செய்து விற்பனை செய்து வருகின்றனர்.

கிலோ 15 ரூபாய்க்கும், மொத்தமாக விற்கும்போது கிலோ 15 ரூபாய்க்கு விற்பனை ஆவதாக கூறுகின்றனர். சில்லரை விற்பனையில் ஒரு பீஸ் தண்ணீர் பழம் பத்து ரூபாய்க்கு விற்பனை ஆவதாகவும் கூறுகின்றனர்.

தற்போது,  கோடை காலம் தொடங்கி விட்டதால் , தர்பூசணி விற்பனை கம்பம் சின்னமனூர் சுற்றுவட்டாரப் பகுதிகளில் சூடு பிடித்துள்ளது என்கின்றனர் தர்ப்பூசணி வியாபாரிகள்.

கம்பம் பகுதியில் கடந்த எட்டு ஆண்டுகளுக்கு மேலாக தர்பூசணி வியாபாரம் செய்து வரும் செல்லப்பாண்டி கூறுகையில், " நீர்ச்சத்து மற்றும் அதிக பயன்கொண்ட தர்பூசணி விற்பனை அதிகமாகவே நடைபெறுகிறது. திண்டிவனம் பகுதியில் இருந்து தர்பூசணி பழங்களை இறக்குமதி செய்து விற்பனை செய்து வருகிறோம்.

தர்பூசணி விலை பொதுவாக ஒரு டன் எட்டாயிரம் முதல் பத்தாயிரம் வரை பழத்தின் தரத்திற்கேற்ப விற்பனையாகும். ஆனால் தற்போது வரத்து குறைந்துள்ளதால் ஒரு டன் 12,000 ரூபாய் முதல் 14, 000 ரூபாய் வரை விற்பனையாகிறது. பழங்களை லாரியில் ஏற்றி விற்பனை செய்யும் இடத்துக்கு  கொண்டு வருவதற்கான டீசல் செலவும் அதிகரித்து காணப்படுவதால் பழங்களின் விலை சற்று உயர்த்த வேண்டிய தேவை ஏற்பட்டுள்ளது.

வரத்து குறைந்த இருந்தாலும், மக்களின் தேவைக்கேற்ப வட மாவட்டங்களிலிருந்து பழங்கள் இறக்குமதி செய்யப்பட்டு தான் வருகிறது.

பழங்களின் வரத்து அதிகரித்தால் தொடர்ந்து சில்லரை விற்பனை காண விலையும் குறையும்" என்றார்.

செய்தியாளர்: சுதர்ஸன்