தேனி மாவட்டத்தில் தேன் உற்பத்தியாளர்களுக்கான விழிப்புணர்வு முகாம்..

தேனி மாவட்டம் காமாட்சிபுரத்தில் உள்ள சென்டெக்ட் வேளாண் அறிவியல் மையத்தில் மத்திய அரசின் கதர்கிராம தொழில்கள் ஆணையத்தின் சார்பில் உலக தேனீக்கள் தினம் கொண்டாடப்பட்டது. மதுரை மண்டல கோட்ட இயக்குனர்  அசோகன் தலைமையில் நடைபெற்ற இந்த நிகழ்ச்சியில் தேனீ வளர்ப்பு, தேன் சேர்ந்த மதிப்பு கூட்டப்பட்ட பொருட்கள் தயாரிப்பு மற்றும் உற்பத்தி பொருட்களுக்கான சந்தை வாய்ப்புகள் குறித்து விவசாயிகளுக்கு பல்வேறு ஆலோசனைகள் வழங்கப்பட்டது.

மேலும் தொழில் முனைவோர்களை உருவாக்கிடும் வகையில் மத்திய அரசு செயல்படுத்தி வரும் பல்வேறு கடன் உதவி திட்டங்கள் குறித்தும், அவற்றை பெறுவதற்கான வழிமுறைகள் குறித்தும் நிகழ்ச்சியில் வங்கி அதிகாரிகள் மற்றும் துறை சார்ந்த வல்லுனர்கள் எடுத்துரைத்தனர்.

பின்னர் தேனீ வளர்ப்பை ஊக்குவிக்கும் விதமாக மத்திய அரசின் தேன் புரட்சி திட்டத்தின் கீழ் மானியமாக தேனீ வளர்ப்பு பெட்டிகளை பெற்று வெற்றிகரமாக தொழில் செய்து வரும் பயனாளிகளுக்கு பாராட்டுச் சான்றிதழ்கள் வழங்கப்பட்டன. முன்னதாக இளைய தலைமுறையினருக்கு தேனீக்கள் பற்றிய விழிப்புணர்வு ஏற்படுத்திடும் வகையில் தேனீக்களின் முக்கியத்துவம் என்ற தலைப்பில் ஓவியப்போட்டி நடைபெற்றது.

தேன் உற்பத்தியாளர்களுக்கான விழிப்புணர்வு முகாம்

இதையும் படிங்க : என்னது இந்த நதி கண்ணுக்கு தெரியாதா? - அதுவும் நம்ம ஈரோட்டில் உள்ளதா..!

இதில் பங்கேற்று தங்களது திறமைகளை வெளிப்படுத்திய பள்ளி குழந்தைகளுக்கும் பாராட்டு சான்றிதழ்கள் மற்றும் கேடயங்கள் வழங்கப்பட்டன. இதுகுறித்து கதர் கிராம தொழில்கள் ஆணையத்தின் மதுரை கோட்ட இயக்குனர் அசோகன் கூறுகையில், "தேன் புரட்சி திட்டத்தின் கீழ் மதுரை மண்டலத்தில் மட்டும் 10 மாவட்டங்களில் 5 ஆயிரத்திற்கும் மேற்பட்ட தேன் வளர்ப்பு பெட்டிகள் இலவசமாக வழங்கப்பட்டுள்ளது. குறிப்பாக தேனி மாவட்டத்திற்கு மட்டும் ஆயிரம் பெட்டிகள் வரை வழங்கப்பட்டுள்ளது.

உங்கள் ஊர் செய்திகளை வீடியோவாக பெற கிளிக் செய்க

தேன் உற்பத்தியை மட்டுமல்லாது விவசாய உற்பத்தியையும் பெருக்கிடும் வகையில் இத்திட்டம் செயல்படுத்தப்பட்டு வருவதாகவும் கிராம தொழில்களான அகர்பத்தி தயாரிக்கும் திட்டம், மண்பாண்டம் தயாரிக்கும் திட்டம் உள்ளிட்ட கிராம தொழில்களை ஊக்குவிக்கும் பல்வேறு திட்டங்களையும் செயல்படுத்தப்படுகிறது” என கூறினார்.