தமிழகத்தில் இடி மின்னலுடன் வெளுத்துவாங்கப்போகும் மழை : எங்கெல்லாம் தெரியுமா?

"கிழக்கு திசை காற்றின் வேகமாறுபாடு காரணமாக, தென் தமிழகம் மற்றும் வட தமிழக உள் மாவட்டங்களில் இடி மின்னலுடன் கூடிய மிதமான மழைக்கு வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.

இது தொடர்பாக சென்னை வானிலை ஆய்வு மையம் வெளியிட்டுள்ள அறிக்கையில் தெரிவிக்கப்பட்டுள்ளதாவது:-

வானிலை தகவல் கிழக்கு திசை காற்றின் வேகமாறுபாடு காரணமாக, 10-ம் தேதி தென் தமிழகம் மற்றும் வட தமிழக உள் மாவட்டங்களில் ஓரிரு இடங்களில் இடி மின்னலுடன் கூடிய லேசானது / மிதமான மழை  பெய்யக்கூடும்.

11-ம் தேதி தென் தமிழகம் மற்றும் வட தமிழக உள் மாவட்டங்களில் ஓரிரு இடங்களில் லேசானது / மிதமான மழை  பெய்யக்கூடும்.

12-ம் தேதி முதல் 14-ம் தேதி வரை: தமிழ்நாடு மற்றும் புதுவை, காரைக்கால் பகுதிகளில் பெரும்பாலும் வறண்ட வானிலையே நிலவும்.

சென்னை மற்றும் புறநகர் பகுதிகளுக்கான வானிலை முன்னறிவிப்பு: அடுத்த 48 மணி நேரத்திற்கு வானம் ஓரளவு மேகமூட்டத்துடன் காணப்படும்.

அதிகபட்ச வெப்பநிலை 34-35 டிகிரி செல்சியஸ் மற்றும் குறைந்தபட்ச வெப்பநிலை 26 டிகிரி செல்சியஸ் அளவில் இருக்கக்கூடும்.

கடந்த 24 மணி நேரத்தில் பதிவான மழை அளவு (சென்டிமீட்டரில்):  

எட்டையபுரம் (தூத்துக்குடி) 5, செங்கோட்டை (தென்காசி), தென்காசி தலா 4, ஆயிக்குடி (தென்காசி), சங்கரன்கோவில் (தென்காசி), கொடுமுடியாறு அணை (திருநெல்வேலி) தலா 3, கோவில்பட்டி (தூத்துக்குடி), பெரியபட்டி (மதுரை) தலா 2, தக்கலை (கன்னியாகுமரி), கள்ளந்திரி (மதுரை), மயிலாடி (கன்னியாகுமரி), ராதாபுரம் (திருநெல்வேலி), மேட்டுப்பட்டி (மதுரை), பேச்சிப்பாறை (கன்னியாகுமரி), கழுகுமலை (தூத்துக்குடி), குண்டாறு அணை (தென்காசி), கருப்பாநதி அணை (தென்காசி), நம்பியாறு அணை (திருநெல்வேலி), ராமநதி அணை (தென்காசி), விருதுநகர் AWS (விருதுநகர்) தலா 1.

மீனவர்களுக்கான எச்சரிக்கை:  ஏதுமில்லை.

இவ்வாறு அந்த அறிக்கையில் தெரிவிக்கப்பட்டுள்ளது.