"நான் நலமுடன்தான் இருக்கிறேன்..." - மருத்துவமனையிலிருந்து வீடியோ வெளியிட்ட ஈ.வி.கே.எஸ் இளங்கோவன்!

மருத்துவமனையில் அனுமதிக்கப்பட்டுள்ள ஈ.வி.கே.எஸ் இளங்கோவன் தான் நலமுடன் இருப்பதாக கூறி வீடியோ வெளியிட்டுள்ளார்.

ஈரோடு கிழக்கு சட்டமன்றத் தொகுதி எம்.எல்.ஏவாக இருந்த திருமகன் ஈவெரா மரணமடைந்ததை தொடர்ந்து நடந்த இடைத்தேர்தலில் அவரது தந்தை ஈ.வி.கே.எஸ் இளங்கோவன் போட்டியிட்டு வெற்றி பெற்றார். தொடர்ந்து தலைமை செயலகத்தில் சபாநாயகர் அப்பாவு முன்னிலையில் எம்.எல்.ஏ.வாக பதவி ஏற்றுக்கொண்டார்.

இந்நிலையில், கடந்த 15ஆம் தேதி நெஞ்சு வலி காரணமாகச் சென்னை அடுத்த போரூரில் உள்ள தனியார் மருத்துவமனையில் அனுமதிக்கப்பட்டார். தொடர்ந்து அவருக்கு கொரோனா தொற்று இருப்பது உறுதி செய்யப்பட்டது. இதையடுத்து இதய ரத்த நாளங்கள் சுருங்கியிருப்பதாகவும் மருத்துவமனை சார்பில் தெரிவிக்கப்பட்டது. தொடர்ந்து தீவிர சிகிச்சைப் பிரிவில் வைத்து மருத்துவர்கள் அவருக்குச் சிகிச்சை அளித்து வந்தனர்.

இந்நிலையில் விரைவில் குணமடைந்து வீடு திரும்புவேன் எனக் கூறி இளங்கோவன் வீடியோ வெளியிட்டுள்ளார். அதில், “நான் நலமுடன் இருக்கிறேன். இரு நாள்களில் வீடு திரும்புவேன்” என்று அவர் பேசியுள்ளார்.

இதற்கிடையே ஈ.வி.கே.எஸ் இளங்கோவன் கொரோனா தொற்றிலிருந்து குணமடைந்துள்ளதாக மருத்துவமனை நிர்வாகம் அறிக்கை வெளியிட்டது. அந்த அறிக்கையில் நெஞ்சுவலி காரணமாக அவர் தீவிர சிகிச்சை பிரிவில் வைக்கப்பட்டு சிகிச்சை அளிக்கப்படுவதாகவும், மெல்ல குணமடைந்து வருவதாகவும் தெரிவிக்கப்பட்டுள்ளது. மேலும், இதய பிரச்சினையிலிருந்தும் அவர் மீண்டு வருவதாகத் தெரிவிக்கப்பட்டது.