“இது உங்களுக்கு ப்ரமோஷன்...” - மனோ தங்கராஜை கூல் படுத்திய முதல்வர்... நடந்தது இதுதான்..!

மு.க.ஸ்டாலின் தலைமையிலான திமுக அரசு 2021ம் ஆண்டு ஆட்சிப் பொறுப்பேற்றது. மு.க.ஸ்டாலின் முதல்வராக பதவியேற்றப் பிறகு அவரது அமைச்சரவை மூன்றாவது முறையாக அமைச்சரவை மாற்றம் செய்யப்பட்டுள்ளது.

முதல்முறையாக கடந்த 2022ஆம் ஆண்டு மார்ச் மாதம் நடைபெற்ற அமைச்சரவை மாற்றத்தில் போக்குவரத்து துறை அமைச்சராக இருந்த ராஜகண்ணப்பன் பிற்படுத்தப்பட்டோர் நலத்துறை அமைச்சராக நியமனம் செய்யப்பட்டார். அவருக்கு பதிலாக பிற்படுத்தப்பட்டோர் நலத்துறை அமைச்சராக இருந்த சிவசங்கர், போக்குவரத்து துறை அமைச்சராக நியமனம் செய்யப்பட்டார்.

இரண்டாவது முறையாக கடந்த டிசம்பர் 2022ஆம் ஆண்டு, உதயநிதி ஸ்டாலின் விளையாட்டுத் துறை அமைச்சராக்கப்பட்டார். அதே நேரத்தில் 10 அமைச்சர்களின் இலாக்காக்கள் மாற்றப்பட்டது.

இந்நிலையில், திமுக அரசு பொறுப்பேற்றதில் இருந்து மூன்றாவது முறையாக தமிழக அமைச்சரவை மாற்றப்பட்டுள்ளது. தங்கம் தென்னரசு நிதி மற்றும் மனிதவள மேலாண்மைத்துறை அமைச்சராகவும், பி.டி.ஆர் பழனிவேல் தியாகராஜன் தகவல் தொழில்நுட்பத்துறை அமைச்சராகவும், டி.ஆர்.பி.ராஜா தொழில்துறை அமைச்சராகவும், மு.பெ.சாமிநாதன் தமிழ் வளர்ச்சித்துறை மற்றும் செய்தித்துறை அமைச்சராகவும் மனோ தங்கராஜ் பால்வளத்துறை அமைச்சராகவும் பதவியேற்றுக்கொண்டனர்.

இந்த இலாக்கா மாற்றத்தையடுத்து, அமைச்சர் மனோ தங்கராஜ் முதலமைச்சர் மு.க.ஸ்டாலினை சந்தித்து வாழ்த்து பெற்றார். இது குறித்து தனது ட்விட்டர் பக்கத்தில் பகிர்ந்துள்ள அவர், ‘பால்வளத்துறை அமைச்சராக பொறுப்பேற்று மாண்புமிகு முதல்வர் அவர்களிடம் வாழ்த்து பெற்ற போது, இது Promotion, IT துறையை சிறப்பாக நடத்தியது போல் பால் வள துறையயும், சிறப்பாக நடத்தவேண்டும் என கூறிய தலைவரின் அன்பு வார்த்தைகள் உற்சாகத்தை தந்தது,தலைவரின் ஆணைக்கிணங்க செயல்படுவேன்’ என பதிவிட்டுள்ளார்.

பால்வளத்துறை அமைச்சராக பொறுப்பேற்று மாண்புமிகு முதல்வர் அவர்களிடம் வாழ்த்து பெற்ற போது,இது Promotion, IT துறையை சிறப்பாக நடத்தியது போல் பால் வள துறையயும்,சிறப்பாக நடத்தவேண்டும் என கூறிய தலைவரின் அன்பு வார்த்தைகள் உற்சாகத்தை தந்தது,தலைவரின் ஆணைக்கிணங்க செயல்படுவேன். pic.twitter.com/RjRkO6cKYv

— Mano Thangaraj (@Manothangaraj) May 11, 2023

அமைச்சர் மனோதங்கராஜ் பால்வளத்துறை அமைச்சராக பொறுப்பேற்றதிற்கு அமைச்சர் பழனிவேல் தியாகராஜன் உள்ளிட்ட பல அமைச்சர்களும் வாழ்த்து தெரிவித்து வருகிறார்கள்.