IPL 2023 : சென்னை சூப்பர் கிங்ஸை சமாளிக்குமா டெல்லி கேபிடல்ஸ்? அணியில் என்ன மாற்றத்தை எதிர்பார்க்கலாம்?

ஐபிஎல் கிரிக்கெட் தொடரில் வலுவான சென்னை சூப்பர் கிங்ஸ் அணியை அதனுடைய ஹோம் கிரவுண்டான சேப்பாக்கத்தில் டெல்லி கேபிடல்ஸ் அணி எதிர்கொள்கிறது. ப்ளே ஆஃப் சுற்றுக்கு முன்னேறுவதற்கான வாய்ப்பு டெல்லி கேபிடல்ஸ் அணிக்கு குறைந்த வரும் நிலையில், இன்றைய போட்டியில் கட்டாயம் வெற்றி பெற வேண்டும் என்ற நெருக்கடியோடு டெல்லி அணி களம் காண்கிறது. சென்னை அணியின் ப்ளே ஆஃப் சுற்றுக்கான வாய்ப்பு பிரகாசமாக உள்ள நிலையில் இன்றைய போட்டியை எந்த வித நெருக்கடியும் இல்லாமல் சென்னை அணி எதிர்கொள்கிறது.

இதுவரை 10 போட்டிகளில் விளையாடியுள்ள டெல்லி அணி 4 போட்டிகளில் வெற்றி பெற்று 8 புள்ளிகளுடன் கடைசி இடத்தில் இருக்கிறது. நெட் ரன் ரேட்டும் மிக குறைவாக இருப்பதால் இனி வரும் 4 போட்டிகளிலும் வெற்றி பெற்றால் மட்டுமே அந்த அணியால் ப்ளே ஆஃப் சுற்றுக்குள் நுழைய முடியும். மிக மெதுவாக விளையாடுகிறார் என்கிற குற்றச்சாட்டு டேவிட வார்னர் மீது உள்ளது. அணியில் அவரை தவிர்த்து மிட்செல் மார்ஷ், ரிலீ ரூசோ ஆகியோர் ஓரளவு விளையாடி வருகின்றனர்.

இவர்களுடன் அமான் கான், அக்சர் படேல் ஆகியோரும் சிறப்பான ஆட்டத்தை வெளிப்படுத்தினால் சென்னை அணிக்கு டெல்லி போட்டி கொடுக்கலாம். பவுலர்களில் இஷாந்த் சர்மா, ஆன்ரிக் நோட்ஜ், மிட்செல் மார்ஷ், குல்தீப் யாதவ், அக்சர் படேல் ஆகியோர் இதுவரை சிறப்பாக பந்து வீசியுள்ளனர். இவர்களின் ஆதிக்கம் இன்றைய போட்டியிலும் தொடர்ந்தால் சென்னை அணிக்கு நெருக்கடியே ஏற்படுத்தலாம். சென்னை அணிக்கு எதிரான இன்றைய போட்டியில் விளையாடும் டெல்லி வீரர்களின் உத்தேச பட்டியல்- ஃபில் சால்ட், டேவிட் வார்னர், மிட்செல் மார்ஷ், ரிலீ ரூசோ, அமான் கான், அக்சர் படேல், மனிஷ் பாண்டே, குல்தீப் யாதவ், இஷாந்த் சர்மா, கலீல் அகமது, முகேஷ் குமார்.