IPL 2023 : லக்னோ அணிக்கு எதிரான மேட்ச்சில் ஐதராபாத் அணி 182 ரன்கள் குவிப்பு…

ஐபிஎல் கிரிக்கெட் தொடரில் லக்னோ அணிக்கு எதிரான ஆட்டத்தில் முதலில் பேட்டிங் செய்துள்ள சன்ரைசர்ஸ் ஐதராபாத் அணி 20 ஓவர்கள் முடிவில் 6 விக்கெட்டுகளை இழந்து 182 ரன்கள் குவித்துள்ளது. ஐதராபாத் ராஜிவ் காந்தி மைதானத்தில் நடைபெற்று வரும் இந்த போட்டியில் டாஸ் வென்ற சன்ரைசர்ஸ் ஐதராபாத் அணி பேட்டிங்கை தேர்வு செய்தது. இதையடுத்து அணியின் தொடக்க வீரர்களாக அன்மோல்ப்ரீத் சிங் மற்றும் அபிசேக் சர்மா ஆகியோர் களத்தில் இறங்கினர்.

அபிசேக் சர்மா 7 ரன்னில் ஆட்டமிழந்து அணிக்கு மோசமான தொடக்கத்தை கொடுத்தார். நிதானமாக விளையாடிய அன்மோல்ப்ரீத் சிங் 27 பந்துகளை எதிர்கொண்டு 7 பவுண்டரிகளுடன் 36 ரன்களை சேர்த்தார். அடுத்து வந்த ராகுல் திரிபாதி 13 பந்துகளில் 20 ரன்கள் எடுக்க கேப்டன் எய்டன் மார்க்ரம் 20 பந்துகளில் 28 எடுத்து ஆட்டமிழந்தார். கடந்த போட்டியில் அதிரடி ஆட்டத்தை வெளிப்படுத்திய கிளென் பிலிப்ஸ் இந்த போட்டியில் முதல் பந்திலேயே நடையைக் கட்டினார்.

12.2 ஓவர்கள் முடிவில் 5 விக்கெட்டுகளை இழந்த ஐதராபாத் அணி 115 ரன்கள் மட்டுமே எடுத்திருந்தது. இதையடுத்து இணைந்த கிளாசன் – அப்துல் சமத் இணை பொறுப்புடன் விளையாடிய 6 ஆவது விக்கெட்டிற்கு 58 ரன்கள் பார்ட்னஷிப் அமைத்தது. கிளாசன் அதிரடியாக 29 பந்துகளில் 3 சிக்சர் மற்றும் பவுண்டரியுடன் 47 ரன்கள் எடுத்தார். 4 சிக்சர்களுடன் சமத் 25 பந்துகளில் 37 ரன்கள் சேர்க்க சன்ரைசர்ஸ் ஐதராபாத் அணி 20 ஓவர்கள் முடிவில் 6 விக்கெட்டுகளை இழந்து 182 ரன்கள் குவித்துள்ளது. இதையடுத்து 183 ரன்கள் எடுத்தால் வெற்றி என்ற சற்று கடினமான இலக்கை நோக்கி லக்னோ அணி வீரர்கள் விளையாடி வருகின்றனர்.