IPL 2023 : 9 ரன்கள் வித்தியாசத்தில் டெல்லியை வென்றது சன்ரைசர்ஸ் ஐதராபாத்

ஐபிஎல் கிரிக்கெட் தொடரில் இன்று நடைபெற்ற பரபரப்பான ஆட்டத்தில் சன்ரைசர்ஸ் ஐதராபாத் அணி டெல்லி கேபிடல்ஸ் அணியை 9 ரன்கள் வித்தியாசத்தில் வென்றது. . டெல்லி அருண் ஜெட்லி மைதானத்தில் நடைபெற்ற இந்த போட்டியில் டாஸ் வென்ற சன்ரைசர்ஸ் அணி கேப்டன் எய்டன் மார்க்ரம் பேட்டிங்கை தேர்வு செய்தார்.இதையடுத்து ஐதராபாத் அணியின் தொடக்க வீரர்களாக அபிசேக் சர்மா மற்றும் மயங்க் அகர்வால் களத்தில் இறங்கினர். மயங்க் அகர்வால் 5 ரன்கள் மட்டுமே எடுத்து ஏமாற்றம் அளித்தார். அடுத்து வந்த ராகுல் திரிபாதி 10 ரன்களும், கேப்டன் மார்க்ரம் 8 ரன்களும், ஹேரி ப்ரூக் ரன் ஏதும் எடுக்காமலும் ஆட்டமிழந்து நடையைக் கட்டினர். விக்கெட்டுகள் ஒரு பக்கம் விழுந்தாலும் பொறுப்புடன் விளையாடிய அபிசேக் சர்மா 36 பந்துகளில் 1 சிக்சர் மற்றும் 12 பவுண்டரிகளுடன் 67 ரன்களை எடுத்தார்.

விக்கெட் கீப்பர் ஹெய்ரிக் கிளாசன் 27 பந்தில் 4 சிக்சர் மற்றும் 2 பவுண்டரியுடன் 53 ரன்கள் எடுத்து கடைசி வரை களத்தில் நின்றார் அப்துல் சமது 21 பந்தில் 2 சிக்சர்களுடன் 28 ரன்கள் எடுக்க சன்ரைசர்ஸ் அணி 20 ஓவர்கள் முடிவில் 6 விக்கெட்டுகளை இழந்து 197 ரன்கள் எடுத்தது. இதையடுத்து 198 ரன்கள் எடுத்தால் வெற்றி என்ற சவாலான இலக்கை நோக்கி டெல்லி அணியின் பேட்ஸ்மேன்கள் விளையாடினர்.

தொடக்க வீரரான கேப்டன் டேவிட் வார்னர் ரன் ஏதும் எடுக்காமல் ஆட்டமிழந்தார். இதையடுத்து பிலிப் சால்ட்டுடன் இணைந்த மிட்செல் மார்ஷ் பொறுப்புடன் விளையாடி ரன்களை சேர்த்தார். இருவரும் 2 ஆவது விக்கெட்டிற்கு 112 ரன்கள் பார்ட்னர்ஷிப் அமைத்தனர். சால்ட் 59 ரன்னில் ஆட்டமிழக்க மிட்செல் மார்ஷ் 63 ரன்கள் எடுத்து வெளியேறினார். மணிஷ் பாண்டே 1 ரன்னும், பிரியம் கார்க் 12ரன்னும் எடுததனர். கடைசி நேரத்தில் 2 சிக்சர் 1 பவுண்டரியுடன் அக்சர் படேல் 14 பந்தில் 29ரன்கள் எடுத்தார். வெற்றிக்காக தீவிரமாக போராடிய டெல்லி அணியால் 20 ஓவர்கள் முடிவில் 188 ரன்கள் மட்டுமே எடுக்க முடிந்து 9 ரன்கள் வித்தியாசத்தில் தோல்வியடைந்தது.