IPL 2023 : 7 ரன்கள் வித்தியாசத்தில் ராஜஸ்தானை வென்றது ஆர்.சி.பி.

ஐபிஎல் கிரிக்கெட் தொடரில் இன்று நடைபெற்ற போட்டியில் ராயல் சேலஞ்சர்ஸ் பெங்களூரு அணி ராஜஸ்தான் ராயல்ஸை 7 ரன்கள் வித்தியாசத்தில் வென்றது. பெங்களூரு சின்னசாமி மைதானத்தில் நடைபெற்ற இந்த போட்டியில், முதலில் விளையாடிய பெங்களூரு அணி 20 ஓவர் முடிவில் 189 ரன்களை எடுத்தது. தொடக்க வீரர்களாக கேப்டன் விராட் கோலி, டூப்ளசிஸ் ஆகியோர் களத்தில் இறங்கினர். கோலி ரன் ஏதும் எடுக்காமலும் அடுத்து வந்த ஷபாஸ் அகமது 2 ரன்னிலும் வெளியேற ஆர்சிபி 12 ரன்களுக்கு 2 விக்கெட்டுகளை இழந்து தடுமாறியது. இதன்பின்னர் இணைந்த டூப்ளசிஸ் – மேக்ஸ்வெல் இணை அதிரடியாக விளையாடிய அணியின் ஸ்கோரை உயர்த்தியது. அபாரமான திறமையை வெளிப்படுத்தி ஆடிய இருவரும் அரைச்சதத்தை கடந்தனர். டூப்ளசிஸ் 39 பந்தில் 2சிக்சர் 8 பவுண்டரியுடன் 62 ரனனும், மேக்ஸ்வெல் 44 பந்துகளில் 4 சிக்சர் மற்றும் 6 பவுண்டரியுடன் 77 ரன்களும் எடுத்தனர்.

இருவரும் 3 ஆவது விக்கெட்டிற்கு 127 ரன்கள் பார்ட்னர்ஷிப் அமைத்தனர். மிடில் ஆர்டர் பேட்ஸ்மேன்கள் பந்துகளை வீணடித்ததால், ரன் குவிப்பு கட்டுப்படுத்தப்பட்டது. லோம்ரோர் 8 ரன்னும், தினேஷ் கார்த்திக் 13 பந்தில் 16 ரன்களும் எடுத்தனர். மற்றவர்கள் ஒற்றை இலக்கத்தில் வெளியேற பெங்களூரு அணி 20 ஓவர்கள் முடிவில் 9 விக்கெட்டுகளை இழந்து 189 ரன்கள் எடுத்தது. இதையடுத்து 190 ரன்கள் எடுத்தால் வெற்றி என்ற இலக்கை நோக்கி ராஜஸ்தான் அணியின் பேட்ஸ்மேன்கள் களத்தில் இறங்கினர். அந்த அணியின் ஓபனிங் பேட்ஸ்மேன் ஜாஸ் பட்லரை 0 ரன்னில் போல்டாக்கி சிராஜ் அசத்தினார். இருப்பினும், அடுத்து இணைந்த யஷஸ்வி ஜெய்ஸ்வால் – தேவ்தத் படிக்கல் இணை சிறப்பாக விளையாடி அணிக்கு நம்பிக்கை அளித்தது.

2 ஆவது விக்கெட்டிற்கு இருவரும் 99 ரன்கள் பார்ட்னர்ஷிப் அமைத்தனர். ஜெய்ஸ்வால் 47 ரன்னும், படிக்கல் 52 ரன்னும் எடுத்து ஆட்டமிழந்தனர். கேப்டன் சஞ்சு சாம்சன் 22 ரன்னில் வெளியேற, துருவ் ஜுரெல் அதிரடியாக விளையாடி பெங்களூரு அணியை நெருக்கடியிலேயே வைத்திருந்தார். கடைசி ஓவரில் வெற்றிபெற 20 ரன்கள் தேவைப்பட்டபோது முதல் பந்தில் பவுண்டரியும், 2 ஆவது பந்தில் 2 ரன்களும், 3 ஆவது பந்தில் இன்னொரு பவுண்டரியும் அடித்து அசத்தினார் அஷ்வின். 4ஆவது பந்தில் அஷ்வின் ஆட்டமிழக்க 2 பந்துகளுக்கு 10 ரன்கள் தேவைப்பட்டது.  5 ஆவது பந்தில் புதிய பேட்ஸ்மேன் அப்துல் பாசித் 1 ரன் எடுக்க, கடைசி பந்தில் ஜுரெலால் 1 ரன் மட்டுமே எடுக்க முடிந்தது. இதன் மூலம் ராயல் சேலஞ்சர்ஸ் பெங்களூரு அணி 7 ரன்கள் வித்தியாசத்தில் வெற்றி பெற்றது. 16 பந்துகளை எதிர்கொண்ட ஜுரெல் 2 சிக்சர், 2 பவுண்டரியுடன் 34 ரன்கள் எடுத்து கடைசி வரை களத்தில் நின்றார்.