IPL 2023 : 72 ரன்கள் வித்தியாசத்தில் சன்ரைசர்ஸ் அணியை வென்றது ராஜஸ்தான்

ஐபிஎல் கிரிக்கெட் தொடரில் இன்று நடைபெற்ற ஆட்டத்தில் சன்ரைசர்ஸ் ஐதராபாத் அணியை 72 ரன்கள் வித்தியாசத்தில் ராஜஸ்தான் ராயல்ஸ் அணி வென்றுள்ளது. டாஸ் வென்ற ஐதராபாத் அணி பவுலிங்கை தேர்வு செய்தது. இதையடுத்து ராஜஸ்தான் அணியின் தொடக்க வீரர்களாக யஷாஸ்வி ஜெய்ஸ்வால் மற்றும் ஜோஸ் பட்லர் ஆகியோர் களத்தில் இறங்கினர். இருவரும் அதிரடியாக விளையாடி ரன்களை குவித்தனர். 5.5 ஓவரில் அணி 85 ரன்கள் எடுத்திருந்தபோது 54 ரன்களுடன் ஜோஸ் பட்லர் ஆட்டமிழந்தார். அடுத்து இணைந்த கேப்டன்  சஞ்சு சாம்சனுடன் இணைந்து ஜெய்ஸ்வால் அதிரடி ஆட்டத்தை தொடர்ந்தார். 37 பந்துகளில் 54 ரன்கள் எடுத்த நிலையில் ஜெய்ஸ்வாலும், 32 பந்துகளில் 55 ரன்கள் குவித்து கேப்டன் சாம்சனும் ஆட்டமிழந்தனர். 14.1 ஓவரில் அணி 151 ரன்கள் எடுததிருந்தபோது 3 விக்கெட்டுகளை இழந்திருந்தது. இதன்பின்னர் ரன்குவிப்பு படிப்படியாக குறைந்தது.

ஒரு கட்டத்தில் 230 ரன்களை ராஜஸ்தான் அணி எளிதாக கடந்து விடும் என்று எதிர்பார்க்கப்பட்டது. ஆனால் கடைசி 6 ஓவர்களில் சன்ரைசர்ஸ் அணியின் பந்து வீச்சாளர்கள் சிறப்பாக பந்து வீசி ஆட்டத்தை கட்டுப்பாட்டிற்குள் கெண்டு வந்தனர். 20 ஓவர்கள் முடிவில் 5 விக்கெட்டுகளை இழந்த ராஜஸ்தான் அணி 203 ரன்கள் எடுத்தது. இதையடுத்து 204 ரன்கள் எடுத்தால் வெற்றி என்ற இலக்கை நோக்கி சன்ரைசர்ஸ் அணி வீரர்கள் களத்தில் இறங்கினர். அபிசேக் சர்மா, ராகுல் திரிபாதி ஆகியோர் ரன் ஏதும் எடுக்காமல் வெளியேறினர். மாயங்க் அகர்வால் 27 ரன்கள் எடுத்தார். ஹேரி ப்ரூக் 13 ரன்னிலும், வாஷிங்டன் சுந்தர் 1 ரன்னிலும் கிளென் பிலிப்ஸ் 8 ரன்னிலும் ஆட்டமிழந்தனர்.

இதனால் 52 ரன்களுக்கு சன்ரைசர்ஸ் அணி 6 விக்கெட்டுகளை இழந்திருந்தது. இதையடுதது அப்துல சமத் – அடில் ரஷித் இணை அதிரடியாக விளையாடி ரன்களை சேர்த்தது. ரஷித் 18 ரன்னில் வெளியேற அடுத்து வந்த கேப்டன் புவனேஸ்வர் குமார் 6 ரன்னும், உம்ரான் மாலிக் 19 ரன்னும் எடுத்தனர். அப்துல் சமத் 32 ரன்கள் சேர்த்தார். 20 ஓவர்கள் முடிவில் 8 விக்கெட்டுகளை இழந்த ஐதராபாத் அணியால் 131 ரன்கள் மட்டுமே எடுக்க முடிந்து 72 ரன்கள் வித்தியாசத்தில் தோல்வியை தழுவியது. ராஜஸ்தான் அணியின் சாஹல் 4 விக்கெட்டுகளை சாய்த்தார்.