IPL 2023 : மும்பைக்கு எதிரான ஆட்டத்தில் 214 ரன்கள் குவித்த பஞ்சாப் அணி

ஐபிஎல் கிரிக்கெட் தொடரில் மும்பை அணிக்கு எதிரான ஆட்டத்தில் முதலில் பேட்டிங் செய்துள்ள பஞ்சாப் அணி 20 ஓவர்கள் முடிவில் 3 விக்கெட்டுகளை இழந்து 214 ரன்கள் குவித்துள்ளது. மும்பை அணியின் ஜோஃப்ரா ஆர்ச்சர் 4 ஓவர்கள் வீசி ஒரு விக்கெட் கூட எடுக்காமல் 56 ரன்களை அளித்துள்ளார். மொஹாலி மைதானத்தில் நடைபெற்று வரும் இந்த போட்டியில் டாஸ் வென்ற மும்பை இந்தியன்ஸ் அணி பந்துவீச்சை தேர்வு செய்தது. இதையடுத்து பஞ்சாப் அணியின் பேட்ஸ்மேன்கள் களத்தில் இறங்கினர்.

தொடக்க வீரர் பிரப்சிம்ரன் சிங் 9 ரன்னில் அர்ஷத் கான் பந்துவீச்சில் இஷான் கிஷனிடம் கேட்ச் கொடுத்து ஆட்டமிழந்தார். கேப்டன் ஷிகர் தவான் 20 பந்தில் 30 ரன்கள் எடுத்து ஆட்டமிழந்தார். அடுத்துவந்த மேத்யூ ஷார்ட் 27 ரன்னில் வெளியேற பஞ்சாப் அணி 11.2 ஓவர்கள் முடிவில் 3 விக்கெட்டுகளை இழந்த 95 ரன்கள் எடுத்திருந்தது.

இதையடுத்து இணைந்த லியாம் லிவிங்ஸ்டோன் மற்றும் விக்கெட் கீப்பர் ஜிதேஷ் சர்மா இணை மும்பை அணியின் பவுலிங்கை சிதறடித்தது. 4 சிக்சர் 7 பவுண்டரியுடன் லிவிங்ஸ்டோன் 42 பந்துகளில் 82 ரன்கள் குவித்தார். அவருக்கு உறுதுணையாக இருந்த ஜிதேஷ் சர்மா 27 பந்துகளில் 49 ரன்கள் எடுத்தார். இருவரும் 4 ஆவது விக்கெட்டிற்கு 119 ரன்கள் பார்ட்னர்ஷிப் ஏற்படுத்தினர். 20 ஓவர்கள் முடிவில் 3விக்கெட்டுகளை இழந்த பஞ்சாப் அணி 214 ரன்கள் குவித்துள்ளது. இதையடுத்து 215 ரன்கள் எடுத்தால் வெற்றி என்ற இலக்கை நோக்கி மும்பை அணியின் பேட்ஸ்மேன்கள் களத்தில் இறங்கியுள்ளனர்.