IPL 2023 : பந்துகளை வீணடித்த மிடில் ஆர்டர் பேட்ஸ்மேன்கள்… ராஜஸ்தானுக்கு எதிராக 189 சேர்த்தது ஆர்.சி.பி.

ஐபிஎல் கிரிக்கெட் தொடரில் ராஜஸ்தான் அணிக்கு எதிரான ஆட்டத்தில் ராயல் சேலஞ்சர்ஸ் பெங்களூரு அணி 189 ரன்களை எடுத்துள்ளது. ஓபனிங் மற்றும் முன்வரிசை பேட்ஸ்மேன்கள் சிறப்பான தொடக்கத்தை கொடுத்த நிலையில் மிடில் ஆர்டர் பேட்ஸ்மேன்களின் மோசமான ஆட்டத்தால் பெங்களூரு அணி குறைவான ஸ்கோரை எடுத்தது. முதல் 13.1 ஓவரில் பெங்களூரு அணி 2 விக்கெட்டுகளை இழந்து 139 ரன்கள் எடுத்தது. அடுத்த 6.5 ஓவரில் பெங்களூருவால் 50 ரன்கள் மட்டுமே எடுக்க முடிந்தது. பெங்களூரு சின்னசாமி மைதானத்தில் நடைபெற்று வரும் இந்த போட்டியில் டாஸ் வென்ற ராஜஸ்தான் அணி பந்துவீச்சை தேர்வு செய்தது.

தொடக்க வீரர்களாக கேப்டன் விராட் கோலி, டூப்ளசிஸ் ஆகியோர் களத்தில் இறங்கினர். கோலி ரன் ஏதும் எடுக்காமலும் அடுத்து வந்த ஷபாஸ் அகமது 2 ரன்னிலும் வெளியேற ஆர்சிபி 12 ரன்களுக்கு 2 விக்கெட்டுகளை இழந்து தடுமாறியது. இதன்பின்னர் இணைந்த டூப்ளசிஸ் – மேக்ஸ்வெல் இணை அதிரடியாக விளையாடிய அணியின் ஸ்கோரை உயர்த்தியது. அபாரமான திறமையை வெளிப்படுத்தி ஆடிய இருவரும் அரைச்சதத்தை கடந்தனர். டூப்ளசிஸ் 39 பந்தில் 2சிக்சர் 8 பவுண்டரியுடன் 62 ரனனும், மேக்ஸ்வெல் 44 பந்துகளில் 4 சிக்சர் மற்றும் 6 பவுண்டரியுடன் 77 ரன்களும் எடுத்தனர்.

இருவரும் 3 ஆவது விக்கெட்டிற்கு 127 ரன்கள் பார்ட்னர்ஷிப் அமைத்தனர். இருவரின் விக்கெட் விழுந்தபோது அணி 4 விக்கெட் இழப்புக்கு 156 ரன்களை எடுத்து 15 ஓவரை நிறைவு செய்திருந்தது. இதையடுத்து களத்திற்கு வந்த மிடில் ஆர்டர் பேட்ஸ்மேன்கள் பந்துகளை வீணடித்தனர். இதனால் ரன் குவிப்பு கட்டுப்படுத்தப்பட்டது. லோம்ரோர் 8 ரன்னும், தினேஷ் கார்த்திக் 13 பந்தில் 16 ரன்களும் எடுத்தனர். மற்றவர்கள் ஒற்றை இலக்கத்தில் வெளியேற பெங்களூரு அணி 20 ஓவர்கள் முடிவில் 9 விக்கெட்டுகளை இழந்து 189 ரன்கள் எடுத்தது. 210 ரன்களை தாண்டும் என்று எதிர்பார்க்கப்பட்ட நிலையில் மிடில் ஆர்டர் பேட்ஸ்மேன்களின் மோசமான ஆட்டத்தால் அணி 189 ரன்கள் மட்டுமே எடுத்தது. இதையடுத்து 190 ரன்கள் எடுத்தால் வெற்றி என்ற இலக்கை நோக்கி ராஜஸ்தான் அணியின் பேட்ஸ்மேன்கள் விளையாடி வருகின்றனர்.