‘டெல்லி அணியின் கேப்டனை உடனடியாக மாற்றுங்கள்’ – ஹர்பஜன் சிங் வலியுறுத்தல்

டெல்லி கேபிடல்ஸ் அணியின் கேப்டன் டேவிட் வார்னரை உடனடியாக மாற்ற வேண்டும் என்று இந்திய அணியின் முன்னாள் வீரரும் கிரிக்கெட் வர்ணனையாளருமான ஹர்பஜன் சிங் வலியுறுத்தியுள்ளார். வார்னர் தலைமையிலான டெல்லி அணி இந்த தொடர் முழுவதும் மோசனமா ஆட்டத்தை வெளிப்படுத்தி வந்துள்ளது. மொத்தம் இதுவரை 8 போட்டிகளில் விளையாடியுள்ள டெல்லி அணி 2 போட்டிகளில் மட்டுமே வெற்றி பெற்று 4 புள்ளிகளுடன் பாயின்ட்ஸ் டேபிளில் கடைசி இடத்தை பிடித்துள்ளது. 9 ஆவது இடத்தில் மும்பை, 8 ஆவது இடத்தில் சன்ரைசர்ஸ் ஐதராபாத் அணிகள் உள்ளன.

இனி வரும் ஆட்டங்கள் அனனைத்திலும் வெற்றி பெற்றாலும் டெல்லி அணியால் ப்ளே ஆஃப் சுற்றுக்கு தகுதி பெறுவதை உறுதியாக சொல்ல முடியாது. டெல்லி அணியின் தொடர் தோல்விகளுக்கு அதன் கேப்டன் டேவிட் வார்னரை பலரும் விமர்சித்து வருகின்றனர். இந்த நிலையில் வார்னரை கேப்டன் பொறுப்பிலிருந்து நீக்க வேண்டும் என்று முன்னாள் வீரரும் வர்ணனையாளருமான ஹர்பஜன் சிங் வலியுறுத்தியுள்ளார். இது தொடர்பாக அவர் அளித்துள்ள பேட்டியில் கூறியிருப்பதாவது- டெல்லி அணி வெற்றிப் பாதைக்கு திரும்பும் என்கிற நம்பிக்கை எனக்கு இல்லை. இவை அனைத்திற்கும் அந்த அணியின் கேப்டன் டேவிட் வார்னர்தான் பொறுப்பு ஏற்க வேண்டும்.

சன்ரைசர்ஸ் அணிக்கு எதிரான போட்டியில் வார்னர் முன்னரே அவுட்டாகி வெளியேறி விட்டார். அவர் 50 பந்துகளை விளையாடினால் அவை அனைத்தையும் வீணடித்து இருப்பார். பரிசளிப்பு நிகழ்ச்சியின்போது வார்னர் மற்ற வீரர்கள் குறித்து பேசுகிறார். அவர் தான் அணிக்கு என்ன செய்தோம் என்பதை சொல்லவில்லை. இந்த தொடரில் வார்னர் 300க்கும் அதிகமான ரன்களை எடுத்துள்ளார். ஆனால் ஸ்ட்ரைக் படு மோசமாக உள்ளது. டெல்லி அணியின் தோல்விக்கான காரணத்தை டேவிட் வார்னர் கண்ணாடியில் தேட வேண்டும். அவர் உடனடியாக கேப்டன் பொறுப்பிலிருந்து நீக்கப்பட்டு அதனை அக்சர் படேலிடம் அளிக்க வேண்டும். இவ்வாறு அவர் கூறியுள்ளார்.