IPL 2023 : ஆர்.சி.பி.க்கு எதிரான மேட்ச்சில் குஜராத் அணி வெற்றி பெற 198 ரன்கள் இலக்கு

ஐபிஎல் கிரிக்கெட் தொடரில் ராயல் சேலஞ்சர்ஸ் பெங்களூரு அணிக்கு எதிரான ஆட்டத்தில் குஜராத் டைட்டன்ஸ் அணி வெற்றி பெற 198 ரன்கள் இலக்கு நிர்ணயிக்கப்பட்டுள்ளது. பெங்களூரு சின்னசாமி மைதானத்தில் நடைபெற்று வரும் இந்த போட்டியில் டாஸ் வென்ற குஜராத் அணியின் கேப்டன் ஹர்திக் பாண்ட்யா பந்துவீச்சை தேர்வு செய்தார். இதையடுத்து பெங்களூரு அணியின் தொடக்க வீரர்களாக விராட் கோலி மற்றும் டூப்ளசிஸ் ஆகியோர் களத்தில் இறங்கினர். 19 பந்துகளில் 5 பவுண்டரியுடன் 28 ரன்கள் எடுத்து டூப்ளசிஸ் ஆட்டமிழந்தார்.

அடுத்து வந்த மேக்ஸ்வெல் 5 பந்துகளில் சிக்சர் மற்றும் பவுண்டரியுடன் 11 ரன்கள் எடுத்து வெளியேற மஹிபால் லோம்ரோர் 1 ரன்னும், தினேஷ் கார்த்திக் ரன் ஏதும் எடுக்காமலும் ஆட்டமிழந்து ரசிகர்களின் கடும் விமர்சனத்திற்கு ஆளாகினர். அதிரடியாக ரன்களை சேர்த்த மைக்கேல் பிரேஸ்வெல் 16 பந்துகளில் 26 ரன்கள் எடுத்து ஆட்டமிழந்தார். விக்கெட்டுகள் ஒரு பக்கம் விழுந்தாலும் ஓபனிங் பேட்ஸ்மேனாக களத்தில் இறங்கிய விராட் கோலி சதம் அடித்து அணியின் ஸ்கோர் உயர உதவினார்.

அவருக்கு உறுதுணையாக அனுஜ் ராவத் அபாரமான ஆட்டத்தை வெளிப்படுத்த இருவரும் 6 ஆவது விக்கெட்டிற்கு 64 ரன்கள் பார்ட்னர்ஷிப் அமைத்தனர். விராட் கோலி 61 பந்துகளில் 101 ரன்னும், அனுஜ் ராவத் 15 பந்துகளில் 23 ரன்களும் எடுக்க 20 ஓவர்கள் முடிவில் 5 விக்கெட்டுகளை இழந்த பெங்களூரு அணி 197 ரன்கள் எடுத்துள்ளது. இதையடுத்து 198 ரன்கள் எடுத்தால் வெற்றி என்ற இலக்கை நோக்கி குஜராத் அணியின் பேட்ஸ்மேன்கள் களத்தில் இறங்கியுள்ளனர். இந்த மேட்ச்சில் வெற்றி பெற்றால் பெங்களூரு அணி ப்ளே ஆஃப் சுற்றுக்குள் நுழையும் என்பதால் ஆட்டம் விறுவிறுப்பாக அமைந்துள்ளது.