IPL 2023 : குஜராத் அணி வெற்றி பெற 180 ரன்கள் இலக்கு நிர்ணயித்தது கொல்கத்தா நைட் ரைடர்ஸ்

ஐபிஎல் கிரிக்கெட் தொடரில் இன்று நடைபெற்று வரும் ஆட்டத்தில் குஜராத் அணி வெற்றி பெற 180 ரன்கள் இலக்கு நிர்ணயித்துள்ளது கொல்கத்தா நைட் ரைடர்ஸ் அணி. இந்தப் போட்டியில் டாஸ் வென்ற குஜராத் அணியின் கேப்டன் ஹர்திக் பாண்ட்யா பந்து வீச்சை முதலில் தேர்வு செய்தார். இதையடுத்து பேட்டிங்கை தொடர்ந்த கொல்கத்தா அணி 20 ஓவர்கள் முடிவில் 7 விக்கெட்டுகளை இழந்து 179 ரன்கள் எடுத்துள்ளது. கொல்கத்தா அணியில் அதிகபட்சமாக ரஹ்மானுல்லா குர்பாஸ் 39 பந்துகளில் 7 சிக்சர் 5 பவுண்டரியுடன் 81 ரன்கள் எடுத்தார்.

கொல்கத்தா அணியின் தொடக்க வீரர்களாக ஜெகதீசன் மற்றும் குர்பாஸ் ஆகியோர் களத்தில் இறங்கினர் ஜெகதீசன் 15 பந்தில் 19 ரன்கள் எடுத்து ஆட்டமிழக்க அடுத்து வந்த ஷர்துல் தாகூர் ரன் ஏதும் எடுக்காமல் ஆட்டமிழந்தார். வெங்கடேஷ் ஐயர் 11 ரன்னும், நிதிஷ் ராணா 4 ரன்னும் எடுத்து பெவிலியன் திரும்பினர். அதிகம் எதிர்பார்க்கப்பட்ட ரின்கு சிங் 20 பந்துகளில் 19 ரன்கள் எடுத்து ஆட்டமிழந்தார்.

விக்கெட்டுகள் ஒருபக்கம் விழுந்தாலும் இன்னொரு முனையில் சிறப்பாக விளையாடிய ரஹ்மானுல்லா குர்பாஸ் 39 பந்துகளில் 7 சிக்சர் மற்றும் 5 பவுண்டரியுடன் 81 ரன்கள் எடுத்து அணியின் ஸ்கோர் உயர உதவினார். கடைசி நேரத்தில் ஆண்ட்ரே ரஸல் 19 பந்தில் 3 சிக்சர் மற்றும் 2 பவுண்டரியுடன் 34 ரன்கள் சேர்க்க 20 ஓவர்கள் முடிவில் 7 விக்கெட்டுகளை இழந்த கொல்கத்தா அணி 179 ரன்கள் எடுத்தது. இதையடுத்து 180 ரன்கள் எடுத்தால் வெற்றி என்ற இலக்கை நோக்கி குஜராத் அணி வீரர்கள் களத்தில் இறங்கியுள்ளனர்.