CSK v RR மேட்ச்... சேப்பாக்கம் மைதானத்தில் டிக்கெட் வாங்க நள்ளிரவிலிருந்து காத்துக்கிடக்கும் ரசிகர்கள்

சென்னை சேப்பாக்கம் மைதானத்தில் ஐபிஎல் போட்டிக்கான டிக்கெட்டுகளை வாங்க, நள்ளிரவு முதல் ரசிகர்கள் நீண்ட வரிசையில் காத்திருக்கின்றனர்.

ஐ.பி.எல் 2023-ம் தொடர் மார்ச் 31-ம் தேதி தொடங்கி கோலாகலமாக நடைபெற்றுவருகிறது. ஐ.பி.எல் அணிகளிலேயே சென்னை அணிக்கு மிக அதிக அளவில் ரசிகர்கள் உள்ளனர். மூன்று ஆண்டுகளுக்குப் பிறகு இந்தியாவில் பார்வையாளர்களுடன் போட்டிகள் நடைபெறுவதால் ரசிர்கள் மைதானங்களுக்குச் சென்று போட்டியைக் காண்பதில் ஆர்வமாக உள்ளனர்.

சேப்பாக்கம் மைதானத்தில் நடைபெற்ற சென்னை, லக்னோ அணியின் போட்டியில் தோனி அடித்த இரண்டு சிக்ஸர்களுக்கு மைதானம் அதிர்ந்தது.

அதனைத் தொடர்ந்து, சென்னை - ராஜஸ்தான் அணிகளுக்கு இடையேயான ஐபிஎல் போட்டி வரும் 12-ம் தேதி சேப்பாக்கம் மைதானத்தில் நடைபெறவுள்ளது. இந்த போட்டிக்கான டிக்கெட் விற்பனை இன்று காலை 9.30 மணிக்கு தொடங்கும் என ஏற்கனவே அறிவிக்கப்பட்டிருந்தது.

அதன்படி, மைதானத்தில் உள்ள கவுண்டர்களில் 1,500 முதல் 2,500 ரூபாய் வரையிலான டிக்கெட்கள் விற்பனை செய்யப்படவுள்ளன. இதனை வாங்குவதற்காக, டிக்கெட் கவுண்டர்களில், நள்ளிரவு முதலே குவிந்துள்ள ரசிகர்கள், நீண்ட வரிசையில் காத்திருக்கின்றனர்.