Home /ramanathapuram /

ராமநாதபுரத்தில் 200 ஆண்டு கால வரலாற்றை தாங்கி நிற்கும் நெற்களஞ்சியம்- பாதுகாக்கப்படுமா?

ராமநாதபுரத்தில் 200 ஆண்டு கால வரலாற்றை தாங்கி நிற்கும் நெற்களஞ்சியம்- பாதுகாக்கப்படுமா?

ராமநாதபுரம்

ராமநாதபுரம் நெற்களஞ்சியம்

ராமநாதபுரம் மண்டபம் பகுதியில் 200 ஆண்டுகள் பழமையான நெற்களஞ்சியம் சேதமடைந்த நிலையில் உள்ளது.

  • News18 Tamil
  • 2 minute read
  • Last Updated :
  • Mandapam, India
ராமநாதபுரம் மாவட்டம் மண்டபம் பகுதியில் அமைந்துள்ள 200 ஆண்டுகள் பழமைவாய்ந்த நெற்களஞ்சியம் அழியும் நிலையில் உள்ளது, இது போன்ற நெற்களஞ்சியம் ராமநாதபுரம் மாவட்டத்தில் வேறு எங்கு உள்ளது? இது எதற்காக பயன்பட்டது? என்ற வரலாற்றை தெரிந்து கொள்வோம்.

ராமநாதபுரம் மாவட்டம் மண்டபம் பகுதியில் இருந்து பாம்பன் செல்லும் வழியில் இடது பக்கமாக அமைந்துள்ளது இந்த மன்னர் காலத்து நெற்களஞ்சியம்.

நெற்களஞ்சியம் வரலாறு:

நாடு முழுவதிலும் இருந்து ராமேஸ்வரம் ராமநாதசுவாமி திருக்கோவிலுக்கு வருகை தரும் பக்தர்களுக்காக சேதுபதி மன்னர்கள் ராமநாதபுரம் மாவட்டம் முழுவதும் பல சத்திரங்கள் கட்டியுள்ளனர். இந்த சத்திரங்களில் பக்தர்களுக்கு உணவு வழங்கும் நோக்கில் ஆங்காங்கே நெற்களஞ்சியங்களையும் அமைத்துள்ளனர் சேதுபதி மன்னர்கள். இந்த நெற்களஞ்சியத்தை இரையாயிரம் கொண்டான் எனவும் அழைக்கின்றனர்.

ராமநாதபுரத்தில் இருந்த சிறியவகை நெற்களஞ்சியங்கள் தற்போது அழிந்து விட்டன. 200 ஆண்டுகளாக மண்டபம் தோணித்துறை பகுதியில் இருக்கும் இந்த நெற்களஞ்சியமும் அழிவின் விளிம்பில் தான் உள்ளது.

தானிய சேமிப்பு கிடங்கு:

மண்டபம், ராமேஸ்வரம் பகுதியில் விவசாயம் இல்லாததால் சேதுநாட்டின் மற்ற பிற பகுதிகளில் இருந்து நெல் கொண்டு வரப்பட்டு இங்கு சேமித்து வைக்கப்பட்டது. இந்த சேமிப்பு கிடங்கு 15 அடி உயரமும் 50 அடி சுற்றளவும் கொண்டுள்ளது. கீழ் பகுதி அகன்றும் மேலே குறுகியும் காணப்படுகிறது. இதனை சுற்றி கட்டப்பட்டிருக்கும் சுவரானது சுமார் 3 அடி அகலத்தில் உள்ளது. மேலும் மழை மற்றும் கடல் காற்றால் பாதிக்காத வகையில் வட்டவடிவத்தில் கட்டப்பட்டுள்ளது‌.

கூம்பு வடிவில் இருக்கும் இதன் மேற்கூரை இடிந்து விழுந்துள்ளது. இதன் நடுப்பகுதியில் ஒரு சுவர் கட்டப்பட்டு இரு பகுதியாக பிரித்து கட்டியுள்ளனர். இதன் உள்ளே செல்ல வடக்கு பகுதியில் 3 அடி உயரமும் 2 அடி உயரத்தில் படி அமைத்து ஏறிச் செல்லும் வகையில் ஒரு வாசல் உள்ளது.

பாறைகளால் கட்டப்பட்டது:

இதன் வெளிப்பகுதியில் விளக்கேற்றி வைக்க மாடக்குழி உள்ளது. இதன் மேற்கூரை இடிந்து விழுந்ததில் இதனை சுற்றிலும் மரங்கள் வளர்ந்துள்ளதுடன், மேற்கூரையின் வழியாக உள்ளேயும் தாவரங்கள் வளர்ந்துள்ளன. இந்த நெற்களஞ்சியத்தின் சுற்றுச்சுவர் கடற்கரை பாறைக்கற்களால் கட்டப்பட்டது.

இதன் அருகே உள்ள கோவிலை களஞ்சிய கோவிலாக தற்போதும் அப்பகுதி மக்கள் வழிபடுகின்றனர். நெற்களஞ்சியத்தின் நினைவாக களஞ்சியத்தைப் போல செல்வ செழிப்பாக இருக்க வேண்டும் என்பதற்காக முன்னோர்கள் தம் பிள்ளைகளுக்கு களஞ்சியராஜா, களஞ்சியராணி என்று அதிகளவில் பெயர் சூட்டி உள்ளனர்.

அக்காலத்தில் இந்த நெற்களஞ்சியத்தை பிரம்மச்சாரிகளான ஐந்து இளைஞர்கள் காவலர்களாக நியமிக்கப்பட்டு பாதுகாப்பு அளித்துள்ளனர். அவர்களின் சமாதிகளும் இக்களஞ்சியத்தின் அருகில் உள்ளது.
Published by:Karthick S
First published:

Tags: Local News, Ramanathapuram

அடுத்த செய்தி