திருநள்ளாறு கோயிலில் வைகாசி விசாக பிரம்மோற்சவ விழா..!

புதுச்சேரி மாநிலம் காரைக்கால் அடுத்த திருநள்ளாறில் அமைந்துள்ள உலக பிரசித்தி பெற்ற ஸ்ரீதர்ப்பாரண்யேஸ்வர சுவாமி தேவஸ்தான பிரம்மோற்சவ விழா கடந்த வாரம் கொடியேற்றத்துடன் விமர்சையாக துவங்கியது. பிரம்மோற்சவ விழாவின் முக்கிய நிகழ்ச்சிகளில் ஒன்றான ஸ்ரீசெண்பக தியாகராஜர் உன்மத்த நடனமாடி வசந்த மண்டபத்திற்கு எழுந்தருளும் நிகழ்ச்சி வெகு விமர்சையாக நடைபெற்றது.

அதன்படி ஸ்ரீசெண்பக தியாகராஜர் உன்மத்த நடனமாடி வரும் நிகழ்ச்சி நடைபெறுவதை காண ஆயிரக்கணக்கான பக்தர்கள் வருகை தந்தனர். ஸ்ரீசெண்பக தியாகராஜருக்கு சிறப்பு அபிஷேக ஆராதனைகளும் மகா தீபாராதனை தொடர்ந்து ஸ்ரீசெண்பக தியாகராஜர் உன்மத்த நடனமாடி யதாஸ்தானம் எழுந்தருளும் நிகழ்ச்சி நடைபெறுகிறது.

திருநள்ளாறு கோயிலில் வைகாசி விசாக பிரம்மோற்சவ விழா

தொடர்ந்து, வெள்ளை நிற மலர்களால் அலங்கரிக்கப்பட்ட ஸ்ரீசெண்பக தியாகராஜர் உன்மத்த நடனமாடி வரும் காட்சியைக் காண காரைக்கால் மாவட்டம் மட்டுமல்லாது அண்டை மாவட்டங்களான நாகை, திருவாரூர், தஞ்சை, மயிலாடுதுறை மாவட்டங்களில் இருந்து ஏராளமான பக்தர்கள் திருநள்ளாறு வருகை தந்து சுவாமி தரிசனம் செய்தனர்.

நிகழ்ச்சியில் தருமபுர ஆதீன கட்டளை விசாரணை ஸ்ரீலஸ்ரீ கந்தசாமி தம்பிரான் சுவாமிகள், ஆலய நிர்வாக அதிகாரி அருணகிரிநாதன் உள்ளிட்ட ஏராளமான பக்தர்கள் கலந்து கொண்டு சுவாமி தரிசனம் செய்தனர். விழாவின் முக்கிய நிகழ்ச்சிகளான பஞ்ச முர்த்திகள் தங்க ரிஷப வாகனத்தில் சகோபுர வீதியுலா வரும் 28ம் தேதியும்,வரும் 30ம் தேதி திருத்தேரோட்டமும்,31ம் தேதி ஸ்ரீ சனிபகவான் தங்க காக்கை வாகனத்தில் வீதியுலாவும், 01ம் தேதி தெப்போற்சவமும் நடைபெற உள்ளது.

உங்கள் ஊர் செய்திகளை வீடியோவாக பெற கிளிக் செய்க