விழுப்புரம் மாவட்டத்தில் ஓர் குற்றால அருவி...

மாவட்டத்தில் குளித்து என்ஜாய் பண்ணுவதற்கு ஏற்றவாறு இப்படி ஓர் அருவி இருக்கா? என்று கண்களை அகல திறந்து வியக்கும் அளவில் இயற்கை எழிலோடு அமைந்திருக்கிறது ஒர் இடம்.

இந்த அருவியானது, தூரத்தில் இருந்து பார்க்கும்போது மலையில் இருந்து வெண்மையாக மின்னும் வெள்ளியைப் போன்று, காட்சியளித்து தன் அருகே வருமாறு கவர்ந்திழுக்கிறது.

இயற்கையை ரசித்து மகிழ்பவர்களுக்கும், அருவியில் குளிக்க ஏங்கும் உள்ளங்களுக்கும் இந்த இடம் வாழ்வில் மறக்க முடியாத நினைவுகளைக் கொடுப்பதற்காக காத்துக் கொண்டிருக்கிறது.

இந்த அருவியானது விழுப்புரம் மாவட்டம் செஞ்சி வட்டத்திற்கு உட்பட்ட அனந்தபுரத்திற்கு அருகில் இருக்கும் புதுப்பேட்டை கிராமத்தில் அமைந்துள்ளது. இந்த அருவி உள்ளூர் மக்களால் ‘பெருமாள் ஊத்து’ என்று அழைக்கப்படுகிறது.

அத்துடன், இந்த அருவியானது புதுப்பேட்டை அருவி, செஞ்சி குற்றாலம், மினி குற்றாலம் என பல்வேறு பெயர்களில் செல்லமாக அழைக்கப்படுகிறது.

எப்படி செல்வது? : செஞ்சி வட்டத்தில் உள்ள புதுப்பேட்டை கிராமத்திற்கு சென்றால் அங்கே, மாரியம்மன் கோவில், திரெளபதி அம்மன் கோவில் ஆகிய இரண்டு கோவில்கள் இருக்கும். அங்கே வாகனங்களை நிறுத்திவிட்டு அங்கிருந்து நடந்து செல்ல வேண்டும்.

வழியில் பசுமை போர்த்திய வயல் வெளிகள் உங்களை வாசனையோடு வரவேற்கும். அவைகளுக்கு இடையில் வரப்புகளின் வழியாக நடந்து செல்ல வேண்டும். அப்போது, தூரத்தில் அழகான ஓவியம்போல அருவி உங்கள் கண்ணில் படும்.

அங்கே, பாறைகளின் நடுவே இரண்டு இடங்களில் சுமார் 20 முதல் 30 அடி உயரத்தில் இருந்து தண்ணீரானது அருவியாக பாய்ந்து வெண்மையாக, மின்னும் வெள்ளியைப் போன்று காட்சியளிக்கும். இந்த அழகிய காட்சியானது அடடா! என்ன அழகு என்று உங்களை மெய்சிலிர்க்க வைக்கும். அருகே சென்று, அருவியில் குளித்து மகிழலாம்.

விழுப்புரம் பகுதி மக்களுக்கு இது ஒரு முக்கிய சுற்றுலா தலமாக இருக்கும். ஏனென்றால், விழுப்புரம் மாவட்டத்தில் சொல்லிக்கொள்ளும் அளவிற்கு அருவிகள் கிடையாது என்பதால், இந்த அருவி முக்கியத்துவம் வாய்ந்ததாக இருக்கிறது.

இந்த அருவிக்கு மழை காலங்களில் செல்வதுதான் நல்லது. அப்போதுதான் இந்த அருவியில் தண்ணீர் அதிக அளவில் குளித்து மகிழ்வதற்கு ஏற்ற வகையில் இருக்கும். மற்ற நாட்களில் அவ்வளவாக தண்ணீர் இருக்காது. எனவே, இந்த அருவிக்கு மழைகாலங்களில் சென்று குளித்து என்ஜாய் பண்ணுங்க.