"ஓம்சக்தி.. பராசக்தி.." கோஷங்கள் முழங்க தமிழ்முறையில் சமயபுரம் கோயில் குடமுழுக்கு...

சக்தி ஸ்தலங்களில் முதன்மையானதும், 'ஆயிரம் கண்ணுடையாள்' ஆக அம்மன் அருள்பாலிக்கும் ஸ்தலமாக விளங்குவது சமயபுரம் மாரியம்மன் கோயில்.

உலகப் பிரசித்திப் பெற்ற சமயபுரம் கோயிலில், கிழக்கு ராஜகோபுரம், ஏழுநிலைகள் கொண்டு புதிதாக கட்டப்பட்டு, கோபுரத்தில் உள்ள அழகிய  சிலைகளுக்கு கண்ணை கவரும் வகையில் பஞ்ச வர்ணங்கள் தீட்டப்பட்டுள்ளன.

புதிய, 7 நிலைக் கோபுரத்தை, மண்டல ஸ்தபதி கார்த்திக் தலைமையில், நாமக்கல் சதாசிவம் ஸ்தபதி, பரமத்தி வேலூர் பாஸ்கரன் ஸ்தபதி ஆகியோர் அழகுற கட்டி முடித்துள்ளனர்.

நாமக்கல் மாவட்டம், பரமத்திவேலூர், நன்செய் இடையாரை சேர்ந்த  பொன்னர் - சங்கர் என்ற இரட்டை சகோதரர்கள் உபயத்தில், பல கோடி ரூபாய் செலவில் கட்டப்பட்ட கிழக்கு ராஜகோபுரத்திற்கு இன்று மஹா கும்பாபிஷேகம் நடைபெற்றது.

கடந்த, 3ஆம் தேதி இரவு முதல், இன்று காலை வரை, நடந்த நான்கு கால யாகச்சாலை பூஜைகளை, மதுரை திருப்பரங்குன்றம் சுப்ரமணியசாமி கோயில் ஸ்தானீகர் ராஜா பட்டர் தலைமையில், சமயபுரம் கோயில் அர்ச்சகர்கள் மஹாதேவ சிவாச்சாரியார், கணேச சிவாச்சாரியார், சுவாமிநாத சிவாச்சாரியார் உள்ளிட்டோர் தேவார, திருவாசக முற்றோதல் உள்பட தமிழ் முறையில் செய்தோடு, ஆகம முறையில் தமிழில் குடமுழுக்கும் செய்து வைத்தனர்.

புனிதநீர் கலசங்களில் ஊற்றியபோது, பல்லாயிரக்கணக்கான பக்தர்கள் ஒரேநேரத்தில் "ஓம்சக்தி.. பராசக்தி.." என்று முழங்கியது விண்ணை அதிர வைத்தது.

கும்பாபிஷேக விழாவில், அமைச்சர் கே.என். நேரு, மேயர் அன்பழகன், முன்னாள், அமைச்சர்கள், எம்எல்ஏக்கள், இந்து சமய அறநிலையத்துறை அதிகாரிகள் உள்ளிட்ட பலர் பங்கேற்றனர்.

 கும்பாபிஷேக விழாவிற்கான ஏற்பாடுகளை கோயில் இணை ஆணையர் கல்யாணி மற்றும் திருக்கோயில் ஊழியர்கள் சிறப்பாக செய்திருந்தனர்.திருச்சி மாவட்ட காவல்துறை கண்காணிப்பாளர் சுஜித்குமார் தலைமையில், 500க்கும் மேற்பட்ட போலீசார் பாதுகாப்புப் பணியில் ஈடுபட்டனர்.