திருச்சியில் குறைந்த செலவில் மகிழ்ச்சி நிறைந்த மலை சுற்றுலா - இங்கு இத்தனை அருவிகள் இருக்கா..!

மாவட்டத்தில் உள்ள பச்சைமலை சுமார் 19,076 ஹெக்டேர் பரப்பளவில் பரந்து விரிந்த இடமாகும். கடல் மட்டத்திலிருந்து 2,400 அடி உயரத்தில் இருக்கிறது இந்த மலை. இது, வனத்துறையின் கட்டுப்பாட்டில் இருப்பதால் பாதுகாப்பு நிறைந்த பகுதியாகவே கருதப்படுகிறது.

திருச்சியில் இருந்து 46 கிலோ மீட்டர் தொலைவில் உள்ள துறையூர் சென்று அங்கிருந்து பேருந்து மூலம் நாம் பச்சைமலையை அடையலாம். பேருந்துகளின் எண்ணிக்கை குறைவு என்பதால், சொந்த வாகனத்தில் செல்வதே சிறந்தது என்கின்றனர் சுற்றுலா பயணிகள்.

திருச்சியில் இருந்து துறையூர் வழியாக, ஆத்தூர் சாலையில் பயணித்து உப்பிலியபுரம், சோபனபுரம் வழியாகப் பச்சைமலைக்கு பயணிக்கலாம். அல்லது, பெரம்பலூர் சாலையில் சென்றால் செங்காட்டுப்பட்டி வழியாக மூலக்காட்டை அடைந்து, அங்கிருந்து பச்சைமலைக்குச் செல்லலாம்.

மலைப்பாதை சாலைகள் மலையேற்றத்திற்கு உகந்ததாக இருப்பதால் பலரும் இங்கே சுற்றுலா செல்ல விரும்புகின்றனர். மலை மீது ஏறும்போது, மேகங்கள் கீழிறங்கி வந்து நம்மை வரவேற்று பரவசப்படுத்தும்.

மேலே, செங்காட்டுப்பட்டியில் உள்ள அழகான மங்களம் அருவியில் குளித்து மகிழலாம். அங்கே, பெரிதாக கடைகளோ, தங்குவதற்கு இடமோ இல்லை. அரசு சார்பில் குறிப்பிட்ட அளவில் தங்கும் விடுதிகள் இருக்கின்றன என்பதை நினைவில் வைத்துக் கொள்ளுங்கள்.

அதேசமயம் அங்கே, வீட்டுடன் இணைந்தவாறு இருக்கும் சிறிய கடையில், தேவையானதை சமைத்து கொடுக்க சொன்னால், அதற்கு உண்டான பணத்தை பெற்று சமைத்து கொடுப்பார்கள். இந்த பயணம் மனது மட்டுமல்ல இயற்கையான மூலிகை காற்றை சுவாசித்து என்ஜாய் பண்ணலாம்.

பச்சை மலையில் எருமைப்பள்ளி அருவி, மயிலூற்றுஅருவி, கோரையாறு அருவி என பல்வேறு அருவிகள் இருக்கின்றன. இவற்றுள் எருமைப்பள்ளி, கோரையாறு ஆகிய அருவிகளுக்குச் செல்ல வனத்துறையினரின் அனுமதி அவசியம். இங்கே, பேலூர் பாதுகாக்கப்பட்ட வனப்பகுதி இருக்கிறது. இதில் நாம் ட்ரெக்கிங்கும் போகலாம். இதற்கும் வனத்துறையினரிடம் முன்னதாகவே அனுமதி பெறவேண்டும்.

இந்த பச்சை மலையில், போன் நெட்வொர்க், தங்கும் விடுதிகள், சாப்பிடும் ஹோட்டல்கள் இல்லாத காரணத்தால் இரவு தங்குவது ஏற்புடையதாக இருக்காது. அங்கிருக்கும் அரசின் பயணியர் விடுதியை பயன்படுத்த முன்னனுமதி பெற வேண்டும். எனவே இரவு தங்குவது சிரமமாக இருக்கும். எனவே, ஒருநாள் சுற்றுலாவை திட்டமிடுவது சிறந்தது.