ரூ.24 லட்சம் செலவு.. உடலை ஆபரேஷன் செய்து ஏலியன் போல மாறிய நபர்..!

இயற்கையின் படைப்பில் பெரும்பான்மை மக்கள் இயல்பான தோற்றம் உடையவர்களாகவும், ஒருசில மக்கள் நல்ல வசீகரமான தோற்றம் உடையவராகவும் இருக்கின்றனர். வெகுசிலரின் தோற்றம் கொஞ்சம் வித்தியாசத்துடன் காணப்படும்.இருப்பினும், தங்களுடைய தோற்றமும் வசீகரமானதாக இருக்க வேண்டும் என்ற எண்ணம் பலருக்கு இருக்கிறது. அதனால் தான் சந்தையில் எண்ணற்ற அழகுசாதன பொருட்களின் விற்பனை படு ஜோராக நடக்கிறது. அதையும் தாண்டி சிலர் பிளாஸ்டிக் சர்ஜரி போன்ற அறுவை சிகிச்சையின் மூலமாக தங்கள் தோற்றத்தை அழகானதாக மாற்றிக் கொள்கின்றனர்.

பிளாக் ஏலியன் : அந்தோணி லோஃப்ரெடோ என்பவர் தன்னை கருப்பு ஏலியன் போல மாற்றிக் கொள்ள விரும்பினார். அவர் எப்படி இதைச் செய்தார், தற்போதைய சூழல் என்ன என்பது குறித்து இன்ஸ்டாகிராமில் விவரிக்கப்பட்டுள்ளது. அந்தோணியின் உடலில் எண்ணற்ற அறுவை சிகிச்சை செய்யப்பட்டுள்ளன. அதிர்ச்சிக்குரிய விஷயம் என்னவென்றால் ஏலியன் போல காட்சியளிக்க வேண்டும் என்பதற்காக காதுகளையும், மூக்கு துவாரப் பகுதிகளையும், மேல் உதட்டையும் அறுவை சிகிச்சை மூலமாக அவர் நீக்கியுள்ளார்.

அத்துடன் கண்விழித்திரையின் நிறத்தையும் மாற்றிக் கொண்டுள்ளார். பற்களின் நிறத்தை பர்பிள் நிறத்திற்கு மாற்றும் நோக்கத்தில் டையிங் செய்துள்ளார். இவ்வளவு செய்த பிறகும் அந்தோணி விரும்பிய ஏலியன் தோற்றத்தில் 50% மட்டுமே கிடைத்திருக்கிறதாம்!

புறக்கணிப்பு : அந்தோணியின் வித்தியாசமான முயற்சிக்கு அவரது தாயார் முழு ஆதரவு கொடுத்து வருகிறார். இருப்பினும் சக மனிதர்கள் அந்தோணியை பார்த்து அச்சம் அடைகின்றனர் அல்லது குழப்பம் அடைகின்றனர். இதுகுறித்து அந்தோணி கூறுகையில், “நான் ரெஸ்டாரண்டிற்கு சாப்பிட செல்லும் சமயங்களில் எதிர்ப்புகளை சந்திக்கிறேன். சில சமயம், நான் எல்லோரும் அமர்ந்து சாப்பிடக் கூடிய மாடிப் பகுதியில் அமர்ந்து சாப்பிடுவதற்கு சர்வர்கள் அனுமதிக்க மாட்டார்கள்’’ என்றார்.

யார் என்ன நினைத்தாலும், தன்னுடைய உடல் அமைப்பை மேலும் மாற்றிக் கொள்ளும் இலக்கில் இருந்து விலகப் போவதில்லை என்பதில் அந்தோணி லோஃப்ரெடோ உறுதியாக இருக்கிறார். நிறைய மக்கள் அந்தோணியின் தோற்றத்தை பார்த்து அருவெறுப்பாக உணர்ந்தாலும், நிறைய மக்களுக்கு இவர் ஊக்கமாக இருந்து வருகிறார்.

அதாவது அழகற்ற தங்கள் தோற்றம் குறித்து வருத்தம் கொள்ளத் தேவையில்லை என்று மக்கள் கருதுகின்றனர். முன்னதாக, கடந்த 2021ஆம் ஆண்டு அந்தோணி அளித்த பேட்டி ஒன்றில், தன் உடலை ஏலியன் போல மாற்றியமைக்க 30,000 டாலர்கள் (இந்திய மதிப்பில் ரூ.24 லட்சம்) செலவு செய்திருப்பதாக கூறியது குறிப்பிடத்தக்கது.