குளத்தின் நடுவே உள்ள கோயிலுக்கு இவ்வளவு சிறப்புகளா..? திருவாரூர் போன கண்டிப்பா இங்க போயிட்டு வாங்க..!

சைவ சமயங்களில் தலைமை பீடமாக விளங்க கூடியது தியாகராஜர் கோயில்.

இத்திருக்கோயிலின் மேற்கு பகுதியில் சுமார் ஐந்து ஏக்கர் பரப்பளவில் அமைந்துள்ளது கமலாலயம் என்ற திருப்பெயர் கொண்ட கோயில் குளம்.

இந்த கமலாலய திருக்குளத்தின் பிரம்மாண்டமும், பரப்பளவும் பார்ப்பவர்களின் கண்களை கொள்ளை கொள்ளும் விதமாக இருக்கும்.

முசுகுந்த சக்கரவர்த்திக்காக பூவுலகம் வந்த, திருவிடங்க பெருமானை தரிசிக்க தேவி சக்தி என்னும் பெண் தெய்வம் திருவாரூருக்கு வந்து, இந்த குளத்தை உருவாக்கியதாக புராண கதைகள் கூறுகின்றன.

சக்திதேவி கமலாம்பிகை என்னும் திருப்பெயரில் இந்த குளத்தில் எழுந்தருளியதால் இந்த குளத்திற்கு கமலாலய குளம் என்று பெயர் பெற்றதாக கூறப்படுகிறது.

மிகப் பிரமாண்டமாக அமைந்துள்ள கமலாலய திருக்குளத்தின் நடுவே நாகநாதர் திருக்கோயில் அமைந்துள்ளது.

இந்த நாகநாதர் திருக்கோயில் நடு கோயில், நடுவன் கோயில், நடுவான் கோயில் என்றெல்லாம் அழைக்கப்படுகிறது. குளத்தின் கரையில் இருந்து பார்க்கும்போது இந்த கோயில் மிக சின்னதாக தெரியும். ஆனால், இந்த திருக்கோயில் கிட்டத்தட்ட ஒரு ஏக்கர் பரப்பளவில் அமைய பெற்றுள்ளது.

இந்த நடுவன் கோயிலின் உள்ளே நாகநாதர், யோகாம்பாள் தெய்வங்களும் பக்தர்களுக்கு திருக்காட்சி அளிக்கின்றனர். மேலும், நாகதோஷம் உள்ளவர்கள் இந்த கோயிலுக்கு வந்து, இங்குள்ள நாகநாதரை வழிபட்டு வந்தால் தோஷம் நீங்கும்.

மேலும் குழந்தை பாக்கியம் இல்லாத தாய்மார்கள் திருக்கோயிலுக்கு வந்து இங்கு நடைபெறும் யாகத்தில் பங்கேற்று யோகாம்பாளுக்கு படைத்த தயிர் பிரசாதத்தினை 16 நாட்கள் உண்டு வந்தால் குழந்தை பாக்கியம் கிடைக்கும் என்றும் பக்தர்களால் நம்பப்படுகிறது.

இந்த குளத்தின் நடுவே அமைந்துள்ள நாகநாதர் கோயில் சர்வ தோஷங்களை நீக்கும் வல்லமை கொண்டதாக கூறப்படுகிறது. இக்கோயிலில் நாகநாதர் இருப்பதால் சில நாகங்கள் இக்கோவிலில் இருப்பதாகவும் சொல்லப்படுகிறது.

இக்கோயிலுக்கு படகின் மூலம் மட்டுமே செல்ல முடியும். தினமும் மாலை 5 மணி முதல் 6 மணி வரை இப்படகு இயக்கப்படும். இதில் சென்றால் இந்த கமலாலய குளத்தில் அமைந்துள்ள நாகநாதர் சன்னதிக்கு சென்று இறைவனை வழிபடலாம்.