திருவண்ணாமலை தீபத்திருவிழா கொடியேற்றத்த மிஸ் பண்ணிட்டீங்களா.. இதோ புகைப்படம்!

பஞ்சபூத ஸ்தலங்களில் அக்னி ஸ்தலமாகவும், நினைத்தாலே முக்தி தரும் திருத்தலமாக விளங்குவது அண்ணாமலையார் கோயிலாகும்.

திருவண்ணாமலை அண்ணாமலையார் திருக்கோயில் உலகப் பிரசித்தி பெற்ற விழாவாக கருதப்படும் திருக்கார்த்திகை தீபத்திருவிழா இன்று காலை கொடியேற்றத்துடன் தொடங்கியது.

அதிகாலை 2 மணியளவில் கோவில் நடை திறக்கப்பட்டு அண்ணாமலையார் உண்ணாமலை அம்மனுக்கு சிறப்பு அபிஷேக ஆராதனைகள் நடைபெற்றது.

தொடர்ந்து விநாயகர், முருகர், அண்ணாமலையார், பராசக்தி அம்மன், சண்டிகேஸ்வரர் உள்ளிட்ட பஞ்சமூர்த்திகளுக்கு சிறப்பு அபிஷேக ஆராதனைகள் நடைபெற்றது.  வண்ண வண்ண மலர்களால் அலங்கரிக்கப்பட்டு சிறப்பு தீபாராதனை நடைபெற்றது.

இதனை தொடர்ந்து கோவில் கொடிமரம் முன்பு பஞ்ச மூர்த்திகள் எழுந்தருளியவுடன் அண்ணாமலையார் சந்நதி முன்பு உள்ள 63 அடி உயரம் கொண்ட தங்க கொடிமரத்தில் அண்ணாமலையாருக்கு அரோகரா என்ற பக்தி முழக்கத்துடன் சிவாச்சாரியார்கள் வேத மந்திரங்கள் முழங்க விருச்சக லக்னத்தில் காலை 6:10 மணி அளவில் கொடியேற்றப்பட்டது.

இதனைத் தொடர்ந்து 10 நாட்கள் நடைபெறும் தீபத்திருவிழாவில்  காலை, மாலை என இரண்டு வேளையும் சாமி வீதியுலா நடைபெறும்.
இந்த விழாவின் முக்கிய நிகழ்வாக வருகிற டிசம்பர் 2 ஆம் தேதி இரவு வெள்ளி ரதத்தில் மாட வீதியில் பவனி வந்து பஞ்சமூர்த்திகள் அருள் புரிவார்கள்.

இதைத் தொடர்ந்து வருகிற டிசம்பர் 3ஆம் தேதி மகா தேரோட்டம் நடைபெறும். இதில் 5 லட்சத்துக்கும் அதிகமான பக்தர்கள் கலந்து கொள்வார்கள். நிறைவு நாளான 10வது நாள் டிசம்பர் 6 ம் தேதி அதிகாலை திருக்கோயில் கருவறையின் முன்பு அதிகாலை 4 மணிக்கு பரணி தீபமும், அதனைத் தொடர்ந்து அன்று மாலை 6 மணிக்கு திருக்கோயில் பின்புறம் உள்ள  2,668 அடி உயரம் கொண்ட தீப மலையின் மீது மகா தீபம் ஏற்றப்படும்.

இந்தக் கொடியேற்ற நிகழ்ச்சியில் தமிழக சட்டமன்ற துணைத்தலைவர் கு.பிச்சாண்டி, மாவட்ட ஆட்சியர் பா.முருகேஷ், மாவட்ட காவல் கண்காணிப்பாளர் கார்த்திகேயன் திருக்கோயில் இணை ஆணையர்  அசோக்குமார் உள்ளிட்டோர் கலந்து கொண்டனர்.

இதில் லட்சக்கணக்கான பக்தர்கள் அண்ணாமலைக்கு அரோகரா என்ற பக்தி முழக்கத்துடன் சாமியை தரிசனம் செய்தனர்.