தூத்துக்குடி : கப்பலில் வந்த சுற்றுலா பயணிகளுக்கு கலை நிகழ்ச்சிகள் உடன் உற்சாக வரவேற்பு

துறைமுகம் வந்த சர்வதேச சொகுசு கப்பல் பயணிகளுக்கு இந்திய பாரம்பரிய முறைப்படி மங்கள இசையுடன், நாட்டுப்புற கலை நிகழ்ச்சிகளுடன் வரவேற்பளிக்கப்பட்டது.

எம். எஸ். அமிரா என்ற சர்வதேச சொகுசு கப்பல் சுமார் 698 பயணிகளையும் 386 கப்பல் பணியாளர்களையும் ஏற்றிக்கொண்டு  இன்று தூத்துக்குடி வ.உ.சிதம்பரனார் துறைமுகத்தை வந்தடைந்தது.

நைஸ்- பிரான்ஸ்  நாட்டில் இருந்து கடந்த ஆண்டு டிசம்பர் 22 ஆம் தேதி அன்று புறப்பட்டு 125 நாட்கள் பயணம் மேற்கொண்டு 25 நாடுகளை சுற்றி பார்ப்பதற்காக திட்டமிட்டப்பட்டுள்ளது. இந்த கப்பல் சுற்றுலாவை முடித்துக்கொண்டு 26.04.2023 அன்று ஜெர்மனி நாட்டை சென்றடையும்

இந்த பயணிகள் கப்பலானது  மால்டா - எகிப்து - ஓமன் நாடுகள் மார்க்கமாக பயணத்தை மேற்கொண்டு மும்மை ,கொச்சியை தொடர்ந்து இன்று தூத்துக்குடி துறைமுகத்தை வந்தடைந்தது.
 கப்பலில் பயணித்த பயணிகளை பாரம்பரிய இசையான “நாதஸ்வர மங்கள இசை” மற்றும் நாட்டுப்புற நடனம் ஆடி வரவேற்கப்பட்டனர்.

மேற்கு இந்திய பஹாமாஸ் தீவு கொடியுடன் வந்த எம். எஸ். அமிரா என்ற பயணிகள் கப்பலானது 204 மீட்டர் நீளமும், அதிகபட்சம் 44.8 மீட்டர் காற்று வரைவு, 13 அடுக்குகள் மற்றும் 413 தங்கும் அறைகளுடன், 835 பயணிகளைக் கொண்டு செல்லும் திறன் கொண்டது. ஜெர்மனியிலுள்ள பெர்ன்ஹார்ட் ஷீல்ட் பயணிகள் சேவை மூலம் இயக்கப்படும் இப்பயணிகள் கப்பலில் மூன்று உணவங்கள், ஓய்வறைகள், நூலங்கள், விளையாட்டு, அழகு மற்றும் ஆரோக்கியத்திற்காக அறைகள் மற்றும் நீச்சல் குளங்கள் அமைந்திருப்பது சிறப்பம்சம் ஆகும்.

இக்கப்பலில் பயணம் செய்யும் பயணிகள் பெரும்பாலும் ஜெர்மனி, ஆஸ்திரேலியா, சுவிட்சர்லாந்து, இத்தாலி ஆகிய நாடுகளைச் சேர்ந்தவர்கள். மேலும், இன்று தூத்துக்குடி துறைமுகத்தில் இருந்து மார்க்கமாக கூடுதலாக 5 பயணிகள் இக்கப்பலில் பயணம் மேற்கொண்டனர்.

சுற்றுலா பயணிகள் 70 பேர் திருநெல்வேலியிலுள்ள புனித திரித்துவ தேவாலயம் மற்றும் நெல்லையப்பர் கோயிலுக்கும், 200க்கு மேற்ப்பட்ட சுற்றுலா பயணிகள் தூத்துக்குடியில் உள்ள 450 ஆண்டுகள் பழமையான புனித பனிமய அன்னை பேராலயம் உள்ளிட்ட  இடங்களுக்கு சென்றனர்.  மீண்டும் இப்பயணிகள் கப்பலானது இன்று மாலை  கொலும்பு துறைமுகதிற்கு தனது பயணத்தை துவங்குகிறது.

இந்த கப்பலில் பயணித்த உக்ரைன் நாட்டைச் சேர்ந்த செர்கிம் நியூஸ் 18 அளித்த பேட்டியில், இந்தியா ஒரு அழகான நாடு எங்களுக்கு இந்தியாவிற்க்கு வந்ததில் ரொம்ப சந்தோஷமா இருக்கு. இங்க பலவிதமான கலாச்சாரங்கள் உள்ளன.  இந்த கப்பல் ஒரு வரலாற்று சிறப்பு மிக்க இடத்திற்கு வந்திருக்கிறது. நல்ல மக்கள், அன்பான மக்கள் கலாச்சாரத்துடன் கூடிய வரவேற்பை மக்கள் கொடுத்தனர்.  நாங்கள் ஒரு குழுவாக இங்கு உள்ள கோயில்களுக்கு செல்ல இருக்கிறோம். ஒரு நல்ல இடத்திற்கு வந்திருக்கிறோம் நிறைய விஷயங்கள் தெரிஞ்சுக்க இருக்கிறோம். இங்குள்ள மக்கள் நன்கு பழகுகிறார்கள். இந்திய கலாச்சாரங்களை நான் ரொம்ப விரும்புகிறேன். இந்திய கலாச்சாரத்துடன் இணைந்து அவற்றை அனுபவித்து வருகிறோம்.