சுருளி அருவிக்கு செல்ல வனத்துறையினர் அனுமதி.. ஆனந்தமாய் குளித்து மகிழும் சுற்றுலா பயணிகள்..

வளிமண்டல கீழடுக்கு சுழற்சி மற்றும் பருவ காரணமாக மாவட்டத்தில் பெரும்பாலான பகுதிகளில் சில தினங்களாக தொடர் மழை பெய்து வருகிறது. மேற்கு தொடர்ச்சி மலை வனப்பகுதியிலும் தொடர் மழை பெய்து வருகிறது.

சுருளி வனப்பகுதியிலும்,அரிசிப்பாறை, ஈத்தைப்பாறை, மேகமலை வட்டாரங்களிலும் தொடர் மழை பெய்து வந்தது. ஹைவிவேஸ் மலைப்பகுதியில் உள்ள தூவானம் ஏரியிலிருந்து சுருளி அருவிக்கு நீர்வரத்து ஏற்படும்.

தூவானம் ஏறியிலிருந்து திறக்கப்படும் தண்ணீரும் மலைப்பகுதியில் பெய்கிற மழை நீரும் சேர்ந்து சுமார் 9 கிலோமீட்டர் தூரம் அடர்ந்த வனப்பகுதி வழியாக மூலிகைச் செடிகளில் கலந்து சுருளி அருவியாக கொட்டுகிறது.

இந்தப் பகுதிகளில் பெய்த தொடர் மழை காரணமாக, சுருளி அருவியில் திடீர் வெள்ளப் பெருக்கு கடந்த இரண்டு தினங்களுக்கு முன்பு ஏற்பட்டது. சுருளி அருவியில் திடீரென ஏற்பட்ட வெள்ளப்பெருக்கால் சுருளி அருவிக்கு சுற்றுலா பயணிகள் செல்ல வனத்துறை சார்பாக தடை விதிக்கப்பட்டது.

பொதுமக்கள் யாரும் அருவி பகுதிக்கு செல்லாதவாறு வனத்துறை அதிகாரிகள் தீவிரமாக கண்காணித்து வந்தனர்.
இந்த நிலையில் சுருளி அருவியில் ஏற்பட்ட வெள்ளப்பெருக்கு நின்றதால் நேற்று முதல் சுருளி அருவியில் சுற்றுலா பயணிகள் குளிக்க வனத்துறை சார்பில் மீண்டும் அனுமதி அளிக்கப்பட்டுள்ளது.

தற்போது சுருளி அருவியில் குறைந்த அளவிலான நீர்வரதே உள்ளது குறிப்பிடத்தக்கது.

சுருளி அருவியில் சுற்றுலா பயணிகள் குளிக்க மீண்டும் அனுமதி அளிக்கப்பட்டதை தொடர்ந்து சுற்றுலா பயணிகள் மகிழ்ச்சி அடைந்துள்ளனர்