எம்.ஜி.ஆர். முதல் சிவகார்த்திகேயன் வரை ஆடிப்பாடிய இடம் இதுதான் - தேனி மாவட்ட ஷூட்டிங் ஸ்பாட்!

மாவட்டத்தில் வருசநாடு மலைப்பகுதியில் உருவாகி ஓடி வரும் வைகை ஆற்றின் குறுக்கே கட்டப்பட்டுள்ள வைகை அணை 111 அடி உயரம் கொண்டது. இந்த அணையில் 71 அடி நீரைத் தேக்கி சேமித்து வைக்க முடியும். அணையில் நீர் நிரம்பி இருக்கும்போது, அதன் பின்புறத்தில் மனதை கொள்ளை கொள்ளும் அழகுடன் மேற்கு தொடர்ச்சி மலையுடன் காட்சியளிக்கும்.

பெரியகுளத்தில் இருந்து 13 கி.மீ தொலைவில் இருக்கும் இந்த வைகை அணையானது தேனி, மதுரை, திண்டுக்கல், சிவகங்கை மற்றும் இராமநாதபுரம் மாவட்ட விவசாயத்திற்கும் குடிநீருக்கும் பயனளித்து வருகிறது. இந்த வைகை அணையின் இருபுறமும் சுற்றுலாப் பயணிகள் வந்து செல்ல வசதியாக அழகிய பூங்காக்கள் அமைக்கப்பட்டுள்ளன.

இந்த அணையின் முன்புறமுள்ள சிறிய பாலத்தின் வழியே இரு புறமும் உள்ள பூங்காக்களுக்குச் செல்ல முடியும். இந்தப் பூங்காவின் ஒரு பகுதியில் சிறுவர்கள் விளையாடி மகிழ விளையாட்டுத் திடல்கள் அமைக்கப்பட்டுள்ளன. பூங்காவின் ஓரிடத்தில் தண்ணீர் ஆறு போல் மேலிருந்து கீழ் நோக்கி வரும் வகையில் செயற்கையான அமைப்பும் செய்யப்பட்டுள்ளது. அந்த தண்ணீர் சில மீட்டர் தூரம் வரை பாய்ந்து இறுதியில் சின்ன அணை போன்ற அமைப்பின் வழியாக வெளிவந்து ஒரு அரக்கன் வாயின் வழியே வெளியேறும்படி செய்யப்பட்டுள்ளது. அணையின் முன்புற கரை மீது பாதை அமைக்கப்பட்டுள்ளது.

இத்தகைய பல்வேறு சிறப்புகளை கொண்ட வைகை அணை பகுதி, தேனி மாவட்டத்தில் உள்ள முக்கிய சுற்றுலா தலமாக மட்டுமன்றி சூட்டிங் ஸ்பாட்டாகவும் இருந்து வருகிறது. எம்.ஜி.ஆர். தொடங்கி சிவகார்த்திகேயன் வரையில், ஏராளமான நடிகர் நடிகைகள் இங்கே படப்பிடிப்பிற்காக வந்து சென்றுள்ளனர்.

எம்.ஜி.ஆர்., ஜெயலலிதா நடிப்பில் உருவான மாட்டுக்கார வேலன் படத்தில் வரும் ‘பட்டிக்காடா பட்டணமா ரெண்டும் கெட்டா லெட்சணமா’ பாடலில் வரும் பல காட்சிகள் இந்த வைகை அணையிலும், அதன் அருகில் இருக்கும் பார்க்கிலும் எடுக்கப்படவைதான்.

ராமராஜன், கனகா நடித்த கரகாட்டக்காரன் படத்தில் வரும் ‘இந்த மான் உந்தன் சொந்தமான்’ பாடலின் சில காட்சிகள் இந்த அணையில்தான் எடுக்கப்பட்டன.

விஜயகாந்த் நடித்த ‘அகல் விளக்கு’ பத்தில் வரும் ‘ஏதோ நினைவுகள்... கனவுகள்’ பாடல் இங்குதான் எடுக்கப்பட்டது.

நவரச நாயகன் கார்த்திக் நடித்த ‘பகவதிபுரம் ரயில்வே கேட்’ படத்தில் வரும் ‘செவ்வரளி தோட்டத்திலே உன்ன நினைச்சேன்’ பாடல் இந்த வைகை அணையில்தான் ஷூட் செய்யப்பட்டது. சிந்துநதிப்பூவே படத்தில் வரும் ‘மத்தாளம் கொட்டுதடி மனசு இது மல்லியப்பூ மணக்குற வயசு’ பாலின் சில காட்சிகள் இந்த வைகை அணையில் படம்பிடிக்கப்பட்டது.

சிவகார்த்திகேயன் நடித்த நம்ம வீட்டு பிள்ளை படத்தில் வரும் ‘எங்க அண்ணன் எங்க அண்ணன் அன்ப அள்ளி தெளிக்கிறதில் மன்னன்’ பாடலின் சில காட்சிகள் இந்த அணையில் எடுக்கப்பட்டவைதான்

இதேபோல பெரிய வீட்டு பண்ணை படத்தில் வரும் ஒரு பாடல், ராஜகாளியம்மன் படத்தில் வரும் ‘கல்யாணம் தேவையில்லை’ பாடல் உள்ளிட்ட ஏராளமான திரைப்படங்கள் இங்கே எடுக்கட்டுள்ளன. அந்த வகையில், தேனி மாவட்டத்தில் உள்ள முக்கிய ஷூட்டிங் ஸ்பாட்டாக இருந்து வருகிறது வைகை அணை.