தேனி மாவட்டத்தில் உள்ள சமணர் படுகை - மிஸ் பண்ணக்கூடாத சுற்றுலா தலம்!

மேற்குத் தொடர்ச்சிமலையை ஒட்டி இயற்கை அழகும், பசுமையும் கொஞ்ச காட்சிகளுக்கிறது மாவட்டம். இந்த மாவட்டத்தில் உள்ள ஏராளமான வரலாற்று சின்னங்கள் சிறப்பு சேர்த்து வருகின்றன.

அந்த வகையில், உத்தமபாளையத்தில் இருக்கும் சமணர் படுகை தனிச்சிறப்பு வாய்ந்தது. இங்குள்ள திருகுணகிரி என்ற மலையில் மகாவீரர் உள்ளிட்ட தீர்த்தங்கரர்களின் உருவங்கள் செதுக்கப்பட்டுளளன. இந்த மலையை மொட்டை மலை, சமணர் மலை, கருப்பணசாமி மலை என்று பல்வேறு பெயர்களில் அழைக்கின்றனர்.

இங்குள்ள சமணர் படுகை சுமார் ஆயிரம் ஆண்டுகள் பழமையானது என்று ஆய்வாளர்கள் கருதுகின்றனர். கிழக்குப்புறத்தில் சமண சிற்பங்களும், அவற்றை பாதுகாப்பதற்காக கல் மண்டபமும் அமைக்கப்பட்டுள்ளது. 6 கல்தூண்களையும், மேற்புறம் நீண்ட கற்களையும் கொண்டதாக இந்த கல்மண்டபம் காட்சியளிக்கிறது.

சமண சமயத்தின் 23ஆவது தீர்த்தங்கரரான பார்சுவநாதர், 24ஆவது தீர்த்தங்கரரான மகாவீரர் ஆகியோரது உருவங்கள் இங்குள்ள பாறைகளில் 2 வரிசைகளில் செதுக்கப்பட்டுள்ளன. முதல் வரிசையில் 6 சிற்பங்களும், 2ஆவது வரிசையில் 8 சிற்பங்களும் இடம்பெற்றுள்ளன.

கல்மண்டபத்துக்குள் 20 அடி நீளமும், 10 அடி உயரமும் கொண்ட சமணப்பள்ளி அமைக்கப்பட்டுள்ளது. பார்சுவநாதர் சிற்பத்தின் தலைக்கு மேல் 5 தலை நாகம் காணப்படுகிறது. பக்கவாட்டில், சாமரம் வீசும் பெண் சிற்பங்களும், அந்த சிற்பங்களின் அருகே, வட்டெழுத்துக்களால் ஆன வாசகங்களும் இடம்பெற்றுள்ளன.

இந்த பகுதியில் சமணர்களின் அன்னதானம், அறிவுதானம், அடைக்கல தானம் போன்றவை நடந்ததாகவும், மன்னர்களுக்கும், மக்களுக்கும் மருத்துவ சிகிச்சை அளித்த தகவல்களும் திருகுணகிரி மலையில் உள்ள கல்வெட்டுகளில் இடம்பெற்றுள்ளது.

கி.பி. 9ஆம் நூற்றாண்டை சேர்ந்த பாண்டிய மன்னன் சடையன் மாறன் என்பவர், 1000 பொற்காசுகளை இந்த சமண பள்ளிக்கு வழங்கிய தகவல் இருக்கிறது. இதேபோல, இந்த சமணப்பள்ளியில் அணையா விளக்கு ஒன்றை பராமரித்து வந்த தகவலும் இடம்பெற்றுள்ளது.

இவ்வாறு பல்வேறு வரலாற்று தகவல்களை கொண்டுள்ள சமணர் படுகை, தொல்லியல் துறையின் கட்டுப்பாட்டில் பாதுகாக்கப்பட்ட பகுதியாக இருந்து வருகிறது. தேனி மாவட்டத்துக்கு தரும் சுற்றுலா பயணிகள் இந்த சமணர் படுகையை ஆர்வத்துடன் பார்வையிட்டு செல்கின்றனர்.

தேனி மாவட்டத்திற்கு வரலாற்று சுற்றுலா செல்பவர்கள் மட்டுமல்ல அனைவரும் வந்து பார்க்க வேண்டிய இடமாக இரு திகழ்கிறது. எனவே, தேனி மாவட்டத்தில் உள்ள இந்த சுற்றுலா தலத்தை பார்த்து வியப்பதுடன், முன்னோர்கள் வாழ்வியல் முறைகளையும் அறிந்து கொள்ளுங்கள்.