5 மாவட்ட மக்கள் பொங்கல் வைத்து போற்றும் ஆங்கிலேயர் பென்னிகுவிக்! - யார் இவர்?

1895ஆம் ஆண்டு அக்டோபர் 11ஆம் தேதி, அப்போதைய மாகாண அரசின் கவர்னர் வென்லாக் முன்னிலையில் முல்லை பெரியாறு அணையை கட்டுவதற்கான பணிகள் தொடங்கின. ஆங்கிலேயப் பொறியாளர் கர்னல் பென்னிகுவிக் தலைமையில், 75 இலட்சம் ரூபாய் திட்ட மதிப்பீட்டில் பிரிட்டிஷ் இராணுவத்தின் கட்டுமானத்துறை இந்த அணை கட்டும் பணியை மேற்கொண்டது.

அதன்படி முல்லை பெரியாறு அணை பாதி கட்டப்பட்டிருந்த நிலையில், தொடர்ந்து பெய்த மழையினால் உருவான வெள்ளத்தில் கட்டப்பட்ட அணை அடித்துச் செல்லப்பட்டது. அதன் பிறகு இந்தத் திட்டத்திற்கு பணம் ஒதுக்க ஆங்கிலேய அரசு மறுத்த நிலையில், பென்னிகுவிக் இங்கிலந்திற்குத் திரும்பிச் சென்று, தன் குடும்பச் சொத்துக்கள் அனைத்தையும் விற்று அதன் மூலம் கிடைத்த பணத்தைக் கொண்டுவந்து சொந்த செலவில் இந்த முல்லைப் பெரியாறு அணையைக் கட்டி முடித்தார்.

இந்நிலையில், தமிழ்நாட்டின் தென் மாவட்டங்களான தேனி, திண்டுக்கல், மதுரை, ராமநாதபுரம் மற்றும் சிவகங்கை ஆகிய 5 மாவட்ட மக்களுக்கு நீராதாரமாக திகழ்கிறது முல்லைப் பெரியாறு அணை. இந்த அணையைக் கட்டிய ஆங்கிலேயப் பொறியாளர் கர்னல் ஜான் பென்னிகுவிக்கை தேனி மாவட்ட மக்கள் உள்ளிட்ட 5 மாவட்ட மக்களும் மிகுந்த அன்போடு மரியாதை செலுத்துகின்றனர்.

பென்னிகுவிக் மணிமண்டபம் மேனி மாவட்டத்தில் உள்ள லோயா்கேம்ப் பகுதியில் அமைந்துள்ளது. பெரியார் அணையை உறுதியாக கட்டமைத்ததன நினைவாக தமிழ்நாடு அரசு இந்த மணிமண்டபத்தை நிறுவி மரியாதை செலுத்திவருகிறது.

இங்கு இவருக்கு முழுஉருவ வெண்கல சிலையும், அவர் பயன்படுத்திய நாற்காலி, அணை கட்டுமானத்தின் போது எடுக்கப்பட்ட புகைப்படங்கள், அணையின் மாதிரி வடிவம் போன்றவை உள்ளன. பொதுமக்களும், சுற்றுலாப் பயணிகளும் நாள்தோறும் இதனை பார்வையிட்டுச் செல்கின்றனர்.

பென்னிகுவிக்கின் பிறந்த நாள் விழா 2019ஆம் ஆண்டு முதல் அரசு விழாவாக கொண்டாடப்பட்டு வருகிறது. அதன்படி, இந்த ஆண்டு பென்னி குவிக்கின் 182ஆவது பிறந்தநாள் விழா ஜனவரி 15ஆம் நாள் விமரிசையாக கொண்டாடப்பட இருக்கிறது.

அன்றைய தினம் தேனி மாவட்ட மக்கள் உட்பட 5 மாவட்ட மக்களும் பென்னிகுவிக்குக்கு பொங்கல் வைத்து வழிபடுவதை வழக்கமாகக் கொண்டுள்ளனர். பல்வேறு அரசியல் கட்சித் தலைவர்களும் விவசாய சங்கத் தலைவர்களும், இந்த மணிமண்டபத்திற்கு வந்து பென்னிக்குவிக் சிலைக்கு மாலை அணிவித்து மரியாதை செலுத்துவர்.

இந்த ஆண்டு ராமநாதபுரம் பெரிய கண்மாயில் தொடங்கக்கூடிய புத்தனேந்தலில் தொடங்கி தேனி மாவட்டம் லோயர் கேம்ப் மணிமண்டபம் வரை 5 மாவட்டத்திலும் பொங்கல் வைத்து பென்னிகுவிக் பிறந்தநாள் சிறப்பாக கொண்டாட ஏற்பாடு செய்யப்பட்டு வருகிறது.

எனவே, தேனி மாவட்டம் லோயர் கேம்ப் பகுதியில் உள்ள பென்னிகுவிக் மணிமண்டபத்தில், பென்னிகுவிக் பிறந்தநாள் விழா கொண்டாடுவதற்காக, புதர் மண்டி இருந்த இடங்களை சுத்தம் செய்து மணி மண்டப வளாகம் முழுவதும் பொதுப்பணித்துறையினர் பராமரிப்பு பணிகளை மேற்கொண்டுள்ளனர்.