தஞ்சை பெரிய கோவிலை காக்கும் ரசாயன கலவை!

உலகப் புகழ் பெற்ற தஞ்சை பெரிய கோவில் தமிழர்களின் கட்டிடக்கலைக்கு எடுத்துக்காட்டாக கம்பீரமாகத் திகழ்வதோடு, உலக பாரம்பரிய சின்னமாகவும் உள்ளது. 1000 ஆண்டுகளைக் கடந்தும் உறுதியாக அழகே வடிவாக காட்சியளித்து, காண்போரை வியப்பில் ஆழ்த்துகிறது.

கி.பி. 10 ஆம் நூற்றாண்டில் புகழ்பெற்று விளங்கிய சோழ மன்னன் முதலாம் இராஜ ராஜ சோழன் இக்கோயிலைக் கட்டினான். 1003-1004 ஆம் ஆண்டு தொடங்கி 1010 ஆம் ஆண்டு கட்டி முடிக்கப்பட்ட இந்த கோயிலுக்கு 2010 ஆவது ஆண்டோடு 1000 ஆண்டுகள் நிறைவடைந்தன.

இந்த தஞ்சை பெருவுடையார் கோயில் தமிழகத்தின் மிக முக்கிய சுற்றுலா தலமாக விளங்குகிறது.1987 ஆம் ஆண்டு ஐ.நா. சபையின் கல்வி, அறிவியல், பண்பாட்டு நிறுவனத்தால் (UNESCO) உலகப் பாரம்பரியச் சின்னமாக அறிவிக்கப்பட்டது. அழியாத சோழர் பெருங்கோயில்கள் என்ற பெயரில் இந்த கோவில், கங்கைகொண்ட சோழீசுவரர் கோவில், தாராசுரம் ஐராவதேசுவரர் கோவில் ஆகிய மூன்றும் யுனெஸ்கோ நிறுவனத்தால் பொது ஊழி உலகப்பாரம்பரியக் களப் பட்டியலில் இடம்பெற்றன.

இந்த கோவிலில் 23 வருடங்களுக்குப் பிறகு குடமுழுக்கு, கடந்த 2020ஆம் ஆண்டு ஏப்ரல் மாதம் 5ஆம் தேதி நடைபெற்றது. அதனை முன்னிட்டு, 2 ஆண்டுகளுக்கு முன்பிருந்தே பல்வேறு பராமரிப்பு பணிகள் மேற்கொள்ளப்பட்டன. நுழைவு வாயில், கேரளாந்தகன் கோபுரம், விமான கோபுரம், பெரியநாயகி அம்மன், முருகர், நடராஜர், விநாயகர் சன்னதி கோபுரங்களும் ரசாயன கலவை மூலம் வர்ணம் பூசப்பட்டது.

அதன்படி 2018-19-ம் ஆண்டுகளில், சிதிலமடைந்திருந்த சுதை சிற்பங்களும் சீரமைக்கப்பட்டன. கோபுரத்தில் படிந்திருந்த பறவைகளின் எச்சங்கள், மழைநீரால் படிந்திருந்த பூஞ்சைகள் உள்ளிட்டவை சுத்தம் செய்யப்பட்டதோடு பழமை மாறாமல் இருப்பதற்காக ரசாயன கலவை பூசும் பணிகளும் நடைபெற்றன.

மத்திய அரசின் கட்டுப்பாட்டில் இருக்கும் இந்த கோவிலை தொல்லியல் துறையினர் பராமரித்து வருகின்றனர். இவர்கள் 5 ஆண்டுகளுக்கு ஒருமுறை கோவிலில் பழமை மாறாமல் ரசாயன கலவை கொண்டு வர்ணம் பூசும் பணியை மேற்கொள்வது வழக்கம்.

அதன்படி, இந்த பிரகதீஸ்வரர் கோவிலில் உள்ள விமான கோபுரம் உள்ளிட்ட அனைத்து கோபுரங்களிலும் ரசயான கலவையுடன் வர்ணம் பூசும் பணி வருகிற ஏப்ரல் மாதத்திற்கு பிறகு நடைபெற இருப்பதாகவும். மழைநீரால் பாசி படியாமல் இருப்பதற்காகவும், பறவைகளின் எச்சத்தை அகற்றி அதன் பொலிவு மாறாமல் இந்த பணிகள் மேற்கொள்ளப்படும் என்றும் தொல்லியல் துறையினர் தெரிவித்துள்ளனர்.

தொல்லியல் துறையினர் விமான கோபுரத்தில் ஆய்வு பணிகளை மேற்கொண்டனர். விமான கோபுரத்தில் வர்ணம் பூசும் பணிகள் நிறைவடைந்த பின்னர் இதர கோபுரங்களிலும் இந்த பணிகள் மேற்கொள்ளப்படும் என்று தெரிவிக்கப்பட்டுள்ளது.