நீங்காத நினைவைக் கொடுக்கும் தென்காசி மாவட்ட அணைகளுக்கு ஒரு டிரிப் அடிங்க..

மாவட்டத்தில் உள்ள அணைகளுக்கு சென்று, இயற்கையின் அழகையும், நீரின் குளிச்சியையும், உடலை வருடிச்செல்லும் சுகமான காற்றையும் அனுபவிக்கும் சுகத்தை சுற்றுலா பயணிகள் தவறவிடக்கூடாது.

தென்காசி மாவட்டத்தில், மேற்குதொடர்ச்சி மலை அடிவாரத்தில் அழகே உருவாய் அமைந்துள்ள அடவிநயினார் அணை, கடனாநதி அணை மற்றும் குண்டாறு அணை ஆகியவை சுற்றுலா பயணிகள் அதிகம் விரும்பும் இடங்களாக இருந்து வருகின்றன.

தென்காசி மாவட்டம், செங்கோட்டை வட்டத்தில், மேக்கரைக்கு அருகில் வடகரை பேரூராட்சியில், மேற்குதொடர்ச்சி மலை அடிவாரத்தில் அமைந்துள்ளது அடவிநயினார் அணை (Adavinainar Dam). இந்த அணை அனுமந்த நதியின் குறுக்கே கட்டப்பட்டுள்ளது. தென்காசியில் இருந்து இங்கே செல்வதற்கு அரசுப் பேருந்துகள் இருக்கின்றன.

இந்த அணைக்கு அருகில் சிறுவர் பூங்கா, அடிப்படை வசதிகள் போன்றவை ஏற்பாடு செய்யப்பட்டுள்ளன. குற்றால அருவிக்கு வரும் சுற்றுலா பயணிகள் இங்கே வந்து, தண்ணீரை கண்டு ரசித்து, விளையாடி செல்வதை விரும்புகின்றனர், தமிழக சுற்றுலாப் பயணிகள் மட்டும் அல்லாமல் கேரளா மாநிலம் உட்பட பிற மாநில சுற்றுலாப் பயணிகளும் இங்கே விரும்பி வந்து மகிழ்கின்றனர்.

கடனாநதி அணை: இந்த அணைக்கட்டு சிவசைலம் கிராமத்தில் ஆழ்வார்குறிச்சியில் உள்ளது.இந்த அணைக்கட்டு பகுதிக்கு ஏராளமான சுற்றுலாப் பயணிகள் வருவது வழக்கம். குற்றாலம், சபரிமலை ஐயப்பனுக்கு வரும் ஏராளமான சுற்றுலாப் பயணிகள் இந்த பகுதிக்கு செல்வதை அதிகம் விரும்புகின்றனர்.

மேற்கு தொடர்ச்சி மலைகளின் அடிவாரத்தில் அமைந்துள்ளது இந்த அணையை பார்வையிட வருபவர்கள், அணை மற்றும் அருகில் இருக்கும் பூங்காக்களை ரசித்து மகிழ்கின்றனர். சபரிமலை சீசனின்போது அதிக எண்ணிக்கையிலான சுற்றுலாப்பயணிகள் இங்கே உலா வருவதைப் பார்க்கமுடியும்.

குண்டாறு அணை: குற்றாலம் மற்றும் செங்கோட்டை நகரங்களுக்கு அருகில் மலை அடிவாரத்தில் அமைந்துள்ளது குண்டாறு அணை. இந்த பகுதியில் நிலவும் மிதமான குளிரையும், இதமான வெயிலையும் அனுபவித்து மகிழ ஏராளமான சுற்றுலா பயணிகள் வந்து செல்வது வழக்கம்.

மேற்கு தொடர்ச்சி மலையில் இருந்து சுமார் 1 கி.மீ. தொலைவில் இந்த அணைக்கட்டு அமைந்துள்ளது. இங்கு அழகான அருவி ஒன்றும் அமைந்துள்ளது. இந்த அருவிக்கு சென்று குளிப்பதை பலரும் விரும்புகின்றனர். இங்கே செல்பவர்கள் இந்த அருவியில் நீராடி மகிழ மறக்காதீங்க.