சாதனை முதல் சோதனை வரை... உலகக் கோப்பை இறுதிப் போட்டியின் 10 சுவாரஸ்யஸ்கள்!

1975-ம் ஆண்டு முதல், உலகக்கோப்பைக் கிரிக்கெட் தொடர் நடைபெற்று வரும் நிலையில், முதல்முறையாக கோப்பையை வென்று சாதனை படைத்துள்ளது இங்கிலாந்து அணி. கிரிக்கெட்டை கண்டுபிடித்த நாடான இங்கிலாந்து அதன் சொந்த மண்ணில்  முதன்முறையாக கோப்பையைக் கைப்பற்றியுள்ளது.

உலகக்கோப்பையில் தொடர்ந்து 3-வது முறையாக போட்டியை நடத்திய நாடே கோப்பையை வென்றுள்ளது. 2011-ம் ஆண்டு இந்தியா அடுத்து  2015-ல் ஆஸ்திரேலிய அணி கோப்பையை முத்தமிட்டது. லார்ட்ஸ் மைதானத்தில் நியூசிலாந்தை வீழ்த்தியதன் மூலமாக இங்கிலாந்து அணியும் இந்த வரிசையில் இணைந்தது.

overthrow-ல் பென் ஸ்டோக்ஸின் பேட்டில் பட்டு  பந்து பவுண்டரிக்கு சென்ற நிகழ்வை  Bat of God' என ரசிகர்கள் வர்ணித்து வருகின்றனர். உலகக்கோப்பைக் கால்பந்து போட்டியில், அர்ஜென்டினாவின் மரடோனா அடித்த கோல் ஒன்று சர்ச்சையை ஏற்படுத்தியது. அதனை 'Hand of God' என மரடோனா விளக்கமளித்திருந்தார்.

உலகக்கோப்பை இறுதிப் போட்டியில் தொடர்ச்சியாக 3 மெய்டன் ஓவர்களை வீசிய அணி என்ற பெருமையை நியூசிலாந்து பெற்றுள்ளது. இங்கிலாந்து பேட்டிங் செய்த 10 முதல் 12 ஓவர்கள் வரை நியூசிலாந்து அணி ஒரு ரன் கூட விட்டுக்கொடுக்கவில்லை. இந்த ஓவர்களை ஹென்றி மற்றும் கிராண்ட்ஹோம் வீசினர். 44 ஆண்டுகால உலகக்கோப்பை வரலாற்றில் வேறெந்த இறுதியாட்டத்திலும் இதுபோல் நடந்தது இல்லை.

உலகக்கோப்பை இறுதிப் போட்டியில் சேஸிங்கில் அதிக ரன்கள் எடுத்த ஆல்ரவுண்டர்கள் பட்டியலில் இங்கிலாந்தின் பென் ஸ்டோக்ஸ் முதலிடம் பிடித்துள்ளார். நியூசிலாந்துக்கு எதிரான ஆட்டத்தில் இவர் 84 ரன்கள் எடுத்து இந்த சாதனையை நிகழ்த்தியுள்ளார். ஒட்டுமொத்தமாக சேஸிங்கில் அதிக ரன்கள் எடுத்தவர்களில் இவர் நான்காம் இடத்தில் உள்ளார். முதல் 3 இடங்களை அரவிந்த டி சில்வா, கம்பீர் மற்றும் தோனி ஆகியோர் பிடித்துள்ளனர்.

2019 உலகக்கோப்பையில் தொடர்நாயகன் விருது நியூசிலாந்து கேப்டன் கேன் வில்லியம்சனுக்கு வழங்கப்பட்டது. 578 ரன்கள் அடித்ததுடன், அணியை சிறப்பாக வழிநடத்தியதற்காக அவருக்கு இந்த விருது வழங்கி கவுரவிக்கப்பட்டது. இதன்மூலம் சச்சினுக்குப் பிறகு உலகக்கோப்பை இறுதிப் போட்டியில் தோற்ற அணியின் வீரர் தொடர் நாயகன் விருது வென்றுள்ளது குறிப்பிடத்தக்கது.

ஆஸ்திரேலியாவைத் தொடர்ந்து லண்டன் லார்ட்ஸ் மைதானத்தில் சேஸிங் செய்து உலகக்கோப்பையை வென்ற அணி என்ற சாதனையை இங்கிலாந்து படைத்துள்ளது. லார்ட்ஸ் மைதானத்தில் இதுவரை மொத்தம் 5 உலகக்கோப்பை இறுதிப் போட்டிகள் நடைபெற்றுள்ளன. இதில் 3-ல் முதலில் பேட்டிங் செய்த அணிகளே வென்றுள்ளன. அதேபோல் 2019 தொடரில் நடந்த 4 லீக் ஆட்டங்களிலும் முதலில் ஆடியே அணிகளே வாகை சூடின. இதனால் முதலில் பேட் செய்யும் அணிக்கு சாதகமான மைதானம் என்ற எழுதப்படாத விதியை இங்கிலாந்து அணி நேற்று மாற்றியுள்ளது.

சொந்த நாட்டை விட்டு, மாற்று நாட்டுக்கு உலகக்கோப்பையை வென்று தந்த கேப்டன் என்ற வித்தியாசமான சாதனைக்கு இங்கிலாந்தின் மோர்கன் சொந்தக்காரர் ஆகியுள்ளார். இங்கிலாந்து அணிக்காக முதல் முறையாக உலகக்கோப்பையை கையில் ஏந்திய அவரது பூர்வீகம் அயர்லாந்து ஆகும்.

உலகக்கோப்பை இறுதிப் போட்டியில் அதிக வயதில் 3 விக்கெட்டுகளை வீழ்த்திய வீரர் என்ற சாதனையை இங்கிலாந்தின் பிளங்கெட் படைத்துள்ளார். நியூசிலாந்து வீரர் ஜேம்ஸ் நீஷமின் விக்கெட்டை வீழ்த்திய போது இவரது வயது 34 வருடம், 99 நாட்கள். முன்னதாக இங்கிலாந்தின் டெர்ரிக் பிரிங்கிள் அவரது வயது 33 வருடம் 189 நாட்களாக இருந்த போது இறுதிப் போட்டியில்  3 விக்கெட் வீழ்த்தியதே சாதனையாக இருந்தது.

இந்த உலகக்கோப்பை தொடரில் இங்கிலாந்து அணி மொத்தமாகவே ஒரே ஒரு நோ-பால் மட்டுமே வீசியுள்ளது. நியூசிலாந்துக்கு எதிரான இறுதி ஆட்டத்தில் கிறிஸ் வோக்ஸ் வீசிய அந்த நோ-பால் தான், இந்த உலகக்கோப்பையில், அந்த அணி வீசிய முதல் மற்றும் கடைசி நோ-பால் ஆகும்.