சென்னையில் பெண்கள் மட்டுமே பணியாற்றும் நடமாடும் டீக்கடை..! குவியும் பாராட்டுகள்

சமூகத்தில் ஆண்களுக்கு இணையாக ஒவ்வொரு துறையிலும் பெண்கள் சாதித்து வருகின்றனர். அந்த வரிசையில், பெண்கள் மட்டுமே பணியாற்றும் வகையில், நடமாடும் டீக்கடையை இரண்டு நிறுவனங்கள் இணைந்து சென்னையில் தொடங்கியுள்ளன.

சுற்றுச்சூழலுக்கு மாசு ஏற்படுத்தாத வகையில், மின்சாரத்தில் இயங்கும் ஆட்டோ மூலம், டீ மற்றும் தின்பண்டங்கள் விற்பனை செய்யப்படுகின்றன.

சென்னையில் நடைபெற்ற தொடக்க விழாவில் திரைப்பட நடிகர் நாசர், இயக்குநர் வசந்த், நடிகை ஐஸ்வர்யா ராஜேஷ் உள்ளிட்டோர் கலந்துகொண்டு தொடங்கிவைத்தனர். சென்னையில் தற்போது 6 ஆட்டோக்கள் சேவையைத் தொடங்கியுள்ளன.

இதில், ஆட்டோ ஓட்டுவது, விற்பனை செய்வது என அனைத்துப் பணிகளிலும் பெண்களே ஈடுபடுத்தப்படுகின்றனர். கோடம்பாக்கம், பெரம்பூர், திருவான்மியூர் உள்ளிட்ட இடங்களில் தற்போது இந்த ஆட்டோ டீக்கடைகள் தொடங்கப்பட்டுள்ளன. டீ, காபி, வடை, பஜ்ஜி என 15-க்கும் மேற்பட்ட தின்பண்டங்கள் கிடைக்கின்றன.

வழக்கமான ஆட்டோ ஓட்டுவதைவிட, இதில் பணியாற்றுவது மகிழ்ச்சி அளிக்கிறது என்கிறார் பெண் ஆட்டோ ஓட்டுநர் மோகனா

விரைவில் சென்னை முழுவதும் 50-க்கும் மேற்பட்ட நடமாடும் டீக்கடைகளைத் தொடங்க திட்டமிடப்பட்டுள்ளது. இதுபோன்ற நடவடிக்கைகள் பெண்களுக்கு தன்னம்பிக்கையை அதிகரிக்கும் என்பதில் மாற்றுக்கருத்து இல்லை.