ஓயாத உழைப்பாளி... ஒப்பற்ற படைப்பாளி...! கலைஞர் கருணாநிதிக்கு பிறந்த நாள் வாழ்த்துகள்

தமிழகத்தின் முதலமைச்சராக 5 முறை பதவிவகித்துள்ள மறைந்த திமுக தலைவர் கருணாநிதியின் 96-வது பிறந்த நாள் இன்று. 

என் உயிரினும் மேலான அன்பு உடன்பிறப்புகளே... இந்த சொல் திமுக தொண்டர்களை கிட்டத்தட்ட 50 ஆண்டு காலமாய் கட்டிப்போட்ட மந்திரச் சொல்.

திருவாரூர் திருக்குவளையில் 1924 ஜூன் 3-ம் தேதி தட்சிணாமூர்த்தியாக பிறந்து பின்னாளில் கருணாநிதியாய் மாறி இன்று கலைஞர் என்ற அடைமொழியே அடையாளமாய் மாறி இருக்கிறது.

அரசியல், பத்திரிகை, இலக்கியம், சினிமா, தமிழ்ப் பற்று என எத்திசை திரும்பினும் அத்திசை சூரியனாய் பிரகாசித்த அறிவாலயச் சூரியன் அவர்.

1957 முதல் 2018 வரை தொடர்ந்து சட்டமன்ற உறுப்பினர், 40 ஆண்டுகள் திமுக தலைவர், ஐந்து முறை தமிழகத்தின் முதலமைச்சர் என்று அசைக்க முடியாத ஆட்சி புரிந்தவர்.

இந்தப் பயணத்தை வெறும் வார்த்தைகளில் சொல்லிவிட முடியாது. வெறும் வாழ்க்கை குறிப்பு அல்ல... அளக்க முடியாத விரிவானம். சுறுசுறுப்பை மட்டுமே தனது மூலதனமாகக் கொண்டதன் வெற்றிதான் இது. அனைத்து தலைமுறையும் கற்றுக் கொள்ள வேண்டிய பாடமும் இதுதான்.

பகுத்தறிவை உயிர் மூச்சாய்க் கொண்டு, சமூக நீதியை உயர் மூச்சாய்க் கொண்டு விரல்நோக எழுதி, குரல் தேயப் பேசியதால்தான் தமிழ்நாடு இன்றளவும் தனித்துவமும் மகத்துவமும் பெற்று தலைநிமிர்ந்து நிற்கிறது.

வடக்கின் வளர்ச்சியை தெற்குதான் தீர்மானிக்கும் என்பதை தீர்க்கமாய் நம்பியவர் கலைஞர் என்றால் அது மிகையல்ல. அதிகாலைச் சூரியனுக்கு முன் எழுந்து அந்திசாயும் சூரியனுக்கு பின் தூங்கும் அதிசய சூரியனிடம் இருந்து கற்றுக்கொள்ள வேண்டிய வெற்றியின் ரகசியம் உழைப்பு மட்டுமே.

தனக்கும், தமிழ்நாட்டிற்கும் என எதையும் அவர் எளிதாய் பெற்றிருக்கவில்லை. போராடித்தான் தனக்கான இடத்தை பெற்றிருக்கிறார். இருக்கும் போதும் சரி... இறந்த போதும் சரி..

பெரியாரின் கொள்கைகளையும், அண்ணாவின் கோட்பாடுகளையும் தமிழகத்தின் தலையெழுத்தாய் மாற்றியவர் கலைஞர்.அவர் இல்லாத முதல் பிறந்தநாள் இது.

ஓயாத உழைப்பாளி.. ஒப்பற்ற படைப்பாளி...கலைஞர் கருணாநிதியின் 96-வது பிறந்த நாளில் வாழ்த்துகள் கூறுவதில் பெருமை கொள்கிறது நியூஸ் 18 தமிழ்நாடு.