திருவள்ளூர் வைத்திய வீரராகவர் கோவிலில் பிரம்மோற்சவ விழா.. கொடியேற்றத்துடன் துவக்கம் (படங்கள்)

வைத்திய வீரராகவர் கோவிலில், சித்திரை மாத பிரம்மோற்சவ விழா, காலை 4:45 மணிக்கு கொடியேற்றத்துடன் துவங்கியது .

அதைத்தொடர்ந்து, பூதேவி, ஸ்ரீதேவி சமேதராக உற்சவர் வீரராகவர் தங்க சப்பரத்தில் வீதியுலா வந்தார். மாலை, சிம்ம வாகனத்தில் எழுந்தருளி, பக்தர்களுக்கு அருள்பாலிக்கிறார்.

வரும், 15ம் தேதி வரை, 10 நாட்கள் நடைபெற உள்ள பிரம்மோற்சவ விழாவில், வீரராகவர் பல்வேறு வாகனங்களில் எழுந்தருளி பக்தர்களுக்கு அருள்பாலிக்கிறார். பிரம்மோற்சவத்தின் மூன்றாம் நாள் கருட சேவை எட்டாம் தேதி காலை நடைபெற உள்ளது. அதிகாலை நான்கு மணிக்கு கோபுர தரிசனமும் அதனைத் தொடர்ந்து பிரம்மோற்சவத்தின் 7ம் நாள் வருகிற 12-ஆம் தேதி வீரராகவர் கோவில் தேரோட்டம் நடைபெற உள்ளது.

14ஆம் தேதி தீர்த்தவாரியும் ஆள் மேல் பல்லாக்கு ஊர்வலமும் நடைபெற உள்ளது. நிகழ்ச்சிக்கான ஏற்பாடுகளை, கோவில் கவுரவ ஏஜன்ட் சம்பத் செய்து வருகிறார்.

3 ஆண்டுக்கு பின் தேரோட்டம் திருவள்ளூர் வீரராகவர் கோவிலில், 2019ம் ஆண்டு, உற்சவர் வீரராகவர் பெரிய தேரில் எழுந்தருளி உலா வந்தார்.

2020 மற்றும் 2021ம் ஆண்டு, கொரோனா பெருந்தொற்று காரணமாக, தேரோட்டம் நடைபெறாமல் இருந்தது.

தற்போது, கொரோனா தொற்று குறைந்த நிலையில், மூன்று ஆண்டுக்கு பின், தேரோட்டம் வெகுவிமரிசையாக நடைபெற உள்ளது.

இதற்காக, பெரிய தேர், சீரமைக்கப்பட்டு, வர்ணம் பூசி, தயார் நிலையில் வைக்கப்பட்டு உள்ளது.

வீரராகவர் கோவில் பெரிய தேரை பாதுகாப்புடன் முக்கிய வீதிகளான மாடவீதி, வடக்கு ராஜவீதி உள்ளிட்ட போக்குவரத்து நெரிசல் மிக்க பகுதிகளில் மின்சார வயர்களை துண்டித்து விட்டு செல்ல வேண்டிய ஏற்பாடுகளை திருவள்ளூர் காவல்துறை துணை கண்காணிப்பாளர் சந்திரதாசன் தலைமையிலான காவல்துறையினர் முன்னேற்பாடுகளை செய்துள்ளனர். செய்தியாளர் : பார்த்தசாரதி