லஞ்ச ஒழிப்புத்துறை சோதனை: வீரமணி வீட்டில் கிடைத்தது என்ன?

முன்னாள் அமைச்சர் வீரமணி மற்றும் அவருக்கு நெருக்கமானவர்கள் இடங்களில் நடைபெற்ற சோதனையில்  ரூ.34 லட்சம் ரொக்கம், அமெரிக்க டாலர், சொகுசு கார்கள், நகைகள் ஆகியவை பறிமுதல் செய்யப்பட்டுள்ளதாக   லஞ்ச ஒழிப்புத்துறை  தெரிவித்துள்ளது.

திருப்பத்தூர் மாவட்டம் ஜோலார்பேட்டை முன்னாள் சட்டமன்ற அதிமுக உறுப்பினரும் முன்னாள் அமைச்சருமான கே.சி வீரமணி, அவரது உறவினர்கள், அவர் பங்குதாரராக உள்ள நிறுவனங்கள் மற்றும் அவரது தொடர்பில் உள்ளவர்களுக்கு சொந்தமாக 35 இடங்களில் லஞ்ச ஒழிப்புத்துறை இன்று சோதனை நடத்தியது.

சோதனையில் ரூ.34 லட்சம் ரொக்கம் பறிமுதல் செய்யப்பட்டுள்ளது. இதேபோல் ரூ.1.80 லட்சம் மதிப்புள்ள அமெரிக்க டாலர் கைப்பற்றப்பட்டுள்ளது.

623 சவரன் (4.987 கிலோ) தங்க நகைகள், 47 கிராம் வைர நகைகள், 7.2கிலோ வெள்ளி பொருட்கள் ஆகியவையும் பறிமுதல் செய்யப்பட்டன.

விலையுயர்ந்த 9 சொகுசு கார்கள் பறிமுதல் செய்யப்பட்டன. இதில் ரோல்ஸ் ராய்ஸ் காரும் அடக்கம்.

வங்கி புத்தகம், சொத்து ஆவணங்கள் பறிமுதல் செய்யப்பட்டதோடு 30 லட்சம் ரூபாய் மதிப்பிலுள்ள 275 யூனிட் மணலும் கண்டறியப்பட்டது.