பிடித்த உணவு - பிஸ்கட், கேக்; காவலர்கள் மீது பேரன்பு! தேனி காவல் நிலைய செல்ல நாய் ஒயிட்டியின் கதை

தேனி மாவட்டக் காவல் கண்காணிப்பாளர் அலுவலகத்திற்கு பின்புறம் அமைந்துள்ளது அனைத்து மகளிர் காவல் நிலையம். தேனி மற்றும் பெரியகுளம் தாலுகாவிற்கு என இந்த ஒரே ஒரு மகளிர் காவல் நிலையம் தான் செயல்பட்டு வருகிறது.

இந்த காவல் நிலையத்தில் ஆய்வாளர், இரண்டு துணை ஆய்வாளர், தலைமை காவலர், காவலர் என 27 பேர் பணிபுரிந்து வருகின்றனர். இந்த காவல் நிலையத்தில் 2 வயது ஆண் நாய் ஒன்று குட்டியில் இருந்தே வளர்ந்து வருகிறது.

வெள்ளை நிறத்தில் இருக்கும் இந்த நாய்க்கு பெண் காவலர்கள் வைத்த செல்லப் பெயர்தான் ஒயிட்டி. யாராக இருந்தாலும் இந்த ஒயிட்டியை பார்த்தாலே அதனுடன் விளையாடத் தோன்றும். அந்தஅளவுக்கு சுறுசுறுப்பான நாய்.

தினசரி காவலர்கள் கொடுக்கும் உணவுவை சாப்பிட்டு தினமும் அனைத்து மகளிர் காவல் நிலையத்திலே இருந்து வருகிறது ஒயிட்டி.

இரவு நேரத்தின் போது காவல் நிலையத்தில் யாரேனும் உள்ளே வந்தால் உடனடியாக காவல் நிலைய வாசலுக்கு வந்து அங்கு இருக்கக்கூடிய காவலர்களை குரைத்தே கூப்பிடுகிறது. குடும்ப பிரச்சனை காரணமாக காவல்நிலையத்துக்கு வருபவர்கள் குரலை உயர்த்தி வாக்குவாதம் செய்தால் போதும் கடும் கோவத்துடன் அவர்களை நோக்கி குரைத்தே எச்சரிக்கை செய்கிறது இந்த ஒயிட்டி.

அதேபோல் காவல் நிலையம் அருகே அதிவேகமாக இருசக்கர வாகனத்தில் செல்பவர்களை துரத்தி சென்று எச்சரிக்கை செய்கிறது. வனப் பகுதிக்கு அருகாமையில் அமைந்திருக்கும் இந்த காவல் நிலையத்திற்குள் பாம்புகள் உள்ளிட்ட விஷப் பூச்சிகள் ஏதேனும் வந்தாலும் ஒயிட்டி அவற்றை லாவகமாக விரட்டுகின்றது.

மேலும் அங்கு பணிபுரியும் காவலர்கள் பணி முடிந்து இரவு நேரத்தில் வீட்டிற்கு இருசக்கர வாகனத்தில் செல்லும்போது அவர்களை வழி அனுப்பும் விதமாக சில தூரம் வாகனத்திற்கு பின்னாலே ஓடிச் செல்கிறது. இந்த ஒயிட்டி, பிஸ்கட் மற்றும் கேக் மிகவும் விரும்பி சாப்பிடுவதாகவும் இதற்காகவே பணிபுரியும் காவலர்கள் அவ்வப்போது கேக் பிஸ்கட் கொடுத்து வருகின்றனர்.

காவலர்கள் என்றாலே பணிச்சுமை அதிகமாக தான் இருக்கும். அவ்வாறான நேரங்களில் ஒயிட்டியுடன் நேரத்தை செலவிடும் போது வாலை ஆட்டிக்கொண்டு காலை சுற்றி சுற்றி விளையாடுவதால் மன அழுத்தம் குறைவதாகவும் கூறுகின்றனர் அங்கு பணிபுரியும் காவலர்கள்