கோடை வெயிலோடு மக்களை வாட்டி எடுக்கும் தண்ணீர் பஞ்சம்!

கோடை வெயிலின் தாக்கம் ஒருபுறமிருக்க, தலைநகரான சென்னை உள்ளிட்ட தமிழகத்தின் பல்வேறு பகுதிகள், தண்ணீர் பஞ்சத்தால் தவித்து வருகின்றன.

மக்களின் அடிப்படை தேவைகளில் ஒன்றான தண்ணீருக்கே தமிழகத்தில் தட்டுப்பாடு ஏற்பட்டுள்ளது. குறிப்பாக தலைநகரான சென்னையில் கடும் தண்ணீர் பஞ்சம் நிலவி வருவது, கோடை வெயிலோடு சேர்த்து மக்களுக்கு மேலும் சுமையை ஏற்படுத்தியுள்ளது.

சென்னையில், நாள் ஒன்றுக்கு 850 மில்லியன் லிட்டர் குடிநீர் தேவைப்படும் நிலையில், மெட்ரோ குடிநீர் வாரிய நிர்வாகத்தால் 550 மில்லியன் லிட்டர் மட்டுமே வழங்கப்படுகிறது. இதனால் நகரத்தின் பெரும்பாலான பகுதி மக்கள் தண்ணீரின்றி தவிக்கும் நிலைக்கு தள்ளப்பட்டுள்ளனர்.

லாரி மூலம் போதுமான அளவில் தண்ணீர் விநியோகிக்கப்படுவதில்லை என்று மயிலாப்பூரில் உள்ள சுப்புராயன் சாலையைச் சேர்ந்த மக்கள் குற்றம்சாட்டுகின்றனர். ஒரே ஒரு குடிநீர் குழாய் மட்டுமே இருப்பதாகவும், அதிலும்,கடந்த ஒரு வாரமாக தண்ணீர் வரவில்லை என்றும் அவர்கள் வேதனை தெரிவிக்கின்றனர்.

நாள் முழுவதும் வரிசையில் காத்திருந்து கிடைக்கும் தண்ணீரும், துரு கலந்து வருவதாக கூறுகின்றனர் இப்பகுதி மக்கள். ஒரு கேன் தண்ணீரை 30 ரூபாய்க்கு வாங்கியே சமையல் செய்வதாகவும் அவர்கள் கவலை தெரிவிக்கின்றனர்.

இதேபோல், நீலகிரி மாவட்டம், குன்னூரில், கடும் குடிநீர் தட்டுப்பாடு ஏற்பட்டுள்ளது. ஒரு லட்சத்துக்கும் மேற்பட்டோர் வசிக்கும் இப்பகுதியின் முக்கிய நீராதாரமாக ரேலியா அணை விளங்கி வருகிறது. 46 அடி உயரம் கொண்ட இந்த அணையில், போதிய அளவில் நீர் இல்லாததால், குடிநீரை பணம் கொடுத்து வாங்கும் நிலைக்கு மக்கள் தள்ளப்பட்டுள்ளனர்.

ஒரு குடம் தண்ணீரை இருபது ரூபாய் வரை கொடுத்து வாங்குவதாக கூறும் குன்னூர் பகுதி மக்கள், தேர்தல் நேரத்தில் மட்டும் பெயரளவுக்கு குடிநீர் பிரச்னை தீர்க்கப்படும் என்று அரசியல்வாதிகள் கூறிவிட்டு செல்வதாக தெரிவிக்கின்றனர்.