கிராம ஒற்றுமையை பறைசாற்றும் மீன்பிடி திருவிழா - மகிழ்ச்சியாக மீன்களை பிடித்த  கிராம மக்கள்

மாவட்டம் அருகே திருக்கோளகுடி கிராமத்தில் விவசாயம் செழிக்க , கிராம மக்கள் வேற்றுமையை மறந்து ஒற்றுமையை போற்றும் விதமாக  பெரிய கண்மாயில் மீன்பிடி திருவிழா நடத்துவது வழக்கம்.

கடந்தாண்டு தொடர்ந்து மழை பெய்ததால் கண்மாய் நிரம்பியதால் கிராமத்தில் சார்பில் 12 ஆயிரம் மீன்கள் குஞ்சுகள் வாங்கி கண்மாயில் விடப்பட்டது.

தொடர்ந்து விவசாய தேவைக்கு  கண்மாய் நீரை பயன்படுத்தியதாலும்  கோடைகாலம் தொடங்கியதாலும் கண்மாயில் நீர் வற்றியது. கிராம ஒற்றுமையை பறைசாற்றும்  வகையில்  அதனை சுற்றியுள்ள ஆத்திரம்பட்டி , மின்னல் குடி, ஊசாடிபட்டி, மந்தி பட்டி ,தேவியான்குளம்  மற்றும் சுற்றியுள்ள  கிராம மக்கள் ஒன்று சேர்ந்து கண்மாயில்  மீன்களை பிடித்தனர்.

அதிகாலையில்  சிறியவர்கள் முதல் பெரியவர் என அனைவரும் மடிவலை, கொசு வலை, ஊத்தா, வாரி, அரிகூடை உள்ளிட்ட மீன்பிடி பொருட்களுடன்  மீன்பிடி திருவிழாவில் கலந்து கொண்டு சுவை மிகுந்த விரால் மீன் , குறவை, கட்லா , ரோகு ,கெளுத்தி, உளுவை, கெண்டை, ஜிலேபி போன்ற மீன்களை பிடித்துச் சென்றனர்.

கண்மாய் வற்றியதால்  சுற்றியுள்ள கிராம மக்கள் அனைவரும் ஒற்றுமையுடன் மீன் பிடித்தனர்.

கண்மாயில் மீன் பிடிக்க வந்த அனைவருக்குமே தேவையான அளவில் மீன்கள் கிடைத்ததால் கிராம மக்கள் மகிழ்ச்சி அடைந்தனர். செய்தியாளர் : முத்துராமலிங்கம், காரைக்குடி