ரஜினிகாந்திற்கு வழங்கப்பட்ட சிகிச்சை என்ன? மருத்துவமனை அறிக்கை

டெல்லியில் கடந்த திங்கள்கிழமை நடைபெற்ற தேசிய திரைப்பட விருது வழங்கும் விழாவில் நடிகர் ரஜினிகாந்துக்கு, தாதா சாகேப் பால்கே விருது வழங்கப்பட்டது. பின்னர் அவர் க்கு திரும்பிய நிலையில், நேற்று காலை தனது குடும்பத்தினருடன் 'அண்ணாத்த' திரைப்படத்தை பார்த்ததாக ஹூட் செயலியில் பதிவிட்டிருந்தார்.

ரஜினிகாந்த் நேற்று மாலை திடீரென சென்னை ஆழ்வார்பேட்டையில் உள்ள காவேரி மருத்துவமனையில் அனுமதிக்கப்பட்டார். ஆண்டுக்கு ஒருமுறை செய்யப்படும் வழக்கமான பரிசோதனைக்காகவே ரஜினிகாந்த் மருத்துவமனையில் அனுமதிக்கப்பட்டதாக அவரது மனைவி லதா ரஜினிகாந்த் கூறியிருந்தார்.

இந்நிலையில் ரஜினிகாந்துக்கு அறுவை சிகிச்சை செய்யப்பட்ட தகவல் அதிகாரப்பூர்வமாக வெளியாகியுள்ளது. இது தொடர்பாக வெள்ளிக்கிழமை பிற்பகலில் அறிக்கை வெளியிட்ட காவேரி மருத்துவமனை, தலைசுற்றல் மயக்கம் காரணமாக மருத்துவமனையில் அனுமதிக்கப்பட்டதாகவும், அவரது உடலை முழுமையாக பரிசோதித்த மருத்துவர்கள் குழு, மூளைக்குச் செல்லும் வழியில் ரத்த ஓட்டத்தில் அடைப்பு இருந்தது கண்டு பிடிக்கப்பட்டதாகவும் தெரிவிக்கப்பட்டுள்ளது.

அதைத் தொடர்ந்து "கரோடிட் ஆர்டரி ரீவேஸ்குலரைசேஷன்" என்ற அறுவை சிகிச்சை செய்யப்பட்டதாக மருத்துவமனை நிர்வாகம் தெரிவித்துள்ளது. அவருத்து சிகிச்சை வெற்றிகரமாக மேற்கொள்ளப்பட்டதாகவும், அவரது உடல் நிலை நன்கு தேறி வருவதாகவும், அவர் சில நாட்களில் வீடு திரும்புவார் என்றும் தெரிவிக்கப்பட்டுள்ளது.