ஈஷா மகா சிவராத்திரி 2023: கோவை ஈஷா யோகா மையத்துக்கு வந்த குடியரசுத் தலைவருக்கு உற்சாக வரவேற்பு

இரண்டு நாள் பயணமாக குடியரசு தலைவர் திரவுபதி முர்மு தமிழ்நாடு வந்துள்ளார். குடியரசு தலைவராக பதவியேற்ற பின்னர் திரவுபதி முர்மு முதன் முறையாக தமிழ்நாட்டிற்கு வருகை தந்துள்ளார் என்பது குறிப்பிடத்தக்கது.

டெல்லியில் இருந்து தனி விமானம் மூலம் காலை 11.45 மணிக்கு மதுரை விமான நிலையம் வந்தடைந்த குடியரசு தலைவரை, விமான நிலையத்தில் ஆளுநர் ஆர்.என் ரவி, அமைச்சர் மனோ தங்கராஜ் ஆகியோர் வரவேற்றனர்.

தொடர்ந்து, மீனாட்சி அம்மன் கோயிலுக்கு சென்ற குடியரசு தலைவருக்கு கோயில் நிர்வாகம் சார்பில் பூரண கும்ப மரியாதையுடன் வரவேற்பு அளிக்கப்பட்டது.

பின்னர் மகா சிவராத்திரியையொட்டி குடியரசுத் தலைவர் திரவுபதி முர்மு ஈஷா யோகா மையத்துக்கு வந்தார்.

இதனையொட்டி கோவை ஈஷா மையத்துக்குச் சென்ற குடியரசுத் தலைவர் திரவுபதி முர்முவை, சத்குரு வரவேற்றார்.

இதையடுத்து திரவுபதி முர்மு பேட்டரி காரில் ஈஷா யோகா மையத்தை சுற்றி பார்த்தார். பேட்டரி காரை சத்குரு இயக்கினார்.

அப்போது யோகா மையத்தின் சிறப்புகள் குறித்து திரவுபதி முர்முவிடம் சத்குரு விளக்கினார்.

அவருடன் ஆளுநர் ஆர்என் ரவி, அமைச்சர் மனோ தங்கராஜ் உள்ளிட்டோர் சென்றனர்.

தொடர்ந்து தியான லிங்கத்தில் சிறப்பு பூஜைகள் நடைபெற்றன.