Oorani kaliamman Temple | சித்ரா பவுர்ணமியை முன்னிட்டு பால்குட தீர்த்தம் எடுத்த பக்தர்கள் (படங்கள்)

சித்ரா பவுர்ணமியை முன்னிட்டு கரூரில் புகழ்பெற்ற ஊரணி காளியம்மன் கோவிலுக்கு 500க்கும் மேற்பட்ட பக்தர்கள் பால்குட தீர்த்தம் எடுத்து ஊர்வலமாக வந்தனர்.

கரூர் அருகே தாந்தோணிமலை பகுதியில் அமைந்துள்ள ஊரணி காளியம்மன் கோவிலில் சித்ரா பவுர்ணமி முன்னிட்டு ஸ்ரீ ஊரணி காளியம்மன், ஸ்ரீ வனதுர்க்கை அம்மன், ஸ்ரீ ஆதி மாரியம்மன் கோவில் பகுதிகளை சேர்ந்த பக்தர்கள் 11ம் ஆண்டாக பால்குடம் எடுத்து வருதல் மற்றும் திருவிளக்கு பூஜை நடத்துகின்றனர்.

இதையொட்டி சுங்ககேட் பகுதியில் அமைந்துள்ள ஸ்ரீ ஆதி மாரியம்மன் கோவிலில் இருந்து 500க்கும் மேற்பட்ட பக்தர்கள் தாந்தோணிமலை கடை வீதி வழியாக சிறியது மற்றும் பெரியதுமான அளவில் பால் குடங்களை எடுத்து வந்து, அரசு கலை கல்லூரி அருகில் உள்ள ஊரணி காளியம்மன் கோவிலை வந்தடைந்தனர்.

பால்குட ஊர்வலத்தில் கலந்துகொண்ட சிறியவர்கள், பெரியவர்கள் மற்றும் சிறுவர், சிறுமியர்கள் தங்கள் வேண்டுதலை நிறைவேற்றும் விதமாக கொண்டுவந்த பால்குட தீர்த்தத்தை ஊரணி காளியம்மனுக்கு சமர்ப்பித்தனர்.

இந்நிகழ்ச்சியை தொடர்ந்து நேற்று மாலை  கோவில் வளாகத்தில் சுமங்கலிகள் பங்கேற்கும் திருவிளக்கு பூஜை நடைபெற்றது. தி.கார்த்திகேயன்,செய்தியாளர்