பாஜகவினர் இருசக்கர வாகன பேரணி! காவல்துறை தடையை மீறி சென்றதால் 1 மணி நேரம் போக்குவரத்து பாதிப்பு

மத்தியில் அரசின் 8 ஆண்டு கால சாதனையை விளக்கும் வகையில் மாவட்ட பாஜக இளைஞரணி  சார்பில்  வெண்ணமலை பகுதியில் இருந்து கரூர் நகரம் வழியாக பைபாஸ் சாலையில் உள்ள பாஜக மாவட்ட அலுவலகம் செல்வதற்காக திட்டமிட்டு இருந்தனர்.

கரூர் மாவட்ட பாஜக தலைவர் செந்தில்நாதன் தலைமையில், மாநில இளைஞரணி பொதுச் செயலாளர் ராஜேஷ் இருசக்கர வாகன பேரணியை துவக்கி வைக்க இருந்தார்.பேரணி நடைபெற இருந்த நிலையில், கரூர் மாவட்டம் காவல்துறையினர் அனுமதி மறுத்து பேரணி நடத்தவிடாமல் சாலை இருபுறம்  தடுக்கப்பட்டது. 2 ஏடிஎஸ்பி தலைமையில், 4 டிஎஸ்பி, 5 இன்ஸ்பெக்டர் உள்ளிட்ட  நூற்றுக்கணக்கான காவல்துறையினர், பாஜக இருசக்கர வாகன பேரணி தடுக்கும் வகையில் ஈடுபட்டனர்.

பேரணிக்கு அனுமதி மறுத்ததால் பாஜகவினர் அப்பகுதியில் உள்ள வீடு இடுக்குகள், மற்றும் சந்து பகுதிகளில், காட்டு பகுதிகளில் நுழைந்து பல்வேறு பகுதிகளிலிருந்து பேரணியாக கரூர் பேருந்து நிலையம் வந்தனர். இந்த நிலையில் நகரப் பகுதியில் இரு சக்கர வாகனத்தில் பேரணியாக வந்த பாஜகவினரை போலீசார் தடுத்து நிறுத்தினர். அப்போது போலீசார் மற்றும் பாஜக கட்சியினர் இடையே வாக்குவாதம் ஏற்ப்பட்டது.

கரூர் நகர பகுதிகளில் போலீசார் ஆங்காங்கே தடுத்து பாஜகவினரை கைது செய்தனர். அப்போது இரு சக்கர வாகனத்தையும் பறிமுதல் செய்யப்பட்டு நூற்றுக்கும் மேற்பட்டோர் கைது செய்யப்பட்டனர். கரூர் பேருந்து நிலையம் அருகே கைது செய்யும் பணியில் ஈடுப்பட்டதால் நகரப் பகுதியில் பல்வேறு இடங்களில் 1 மணி நேரத்திற்கு மேல் போக்குவரத்து பாதிப்பு ஏற்பட்டது. இதனால் பொதுமக்கள் மிகவும் சிரமத்துக்கு ஆளாகினர்.

துரத்தி துரத்தி கைது நடவடிக்கையால் கரூர் நகர பகுதி மிகவும் பரபரப்பு ஏற்பட்டது.மேலும்,  இருசக்கர வாகனத்தில் தப்பிச்சென்ற ஒருவரை பிடித்து வண்டியின் சாவியை எடுத்துக்கொண்டு போலீசாருக்கும் பாஜக தொண்டர் ஒருவருக்கும் கடுமையான வாக்குவாதம் ஏற்பட்டது.

கரூர் பேருந்து நிலையம் அருகே பாஜக பெண் தொண்டர் ஒருவர் கோஷங்கள் எழுப்பியவாறு இருந்ததாலும், கைதாக மறுத்ததாலும் பொறுமையை இழந்த ஏடிஎஸ்பி கண்ணன்  பல்லைக் கடித்துக் கொண்டு அந்த பெண்ணை அடிக்க தாவியது பெரும் அதிர்ச்சியை ஏற்படுத்தியது.உடனடியாக பாஜகவினர் அந்த பெண்ணை சமாதான செய்து அழைத்துச் சென்றனர்.

பேரணிக்கு காவல்துறை  அனுமதி அளித்து இருந்தால் சுமார் 20 நிமிடங்களில் பேரணி முடிந்து இருக்கும். அனுமதி மறுத்ததால் சுமார் மூன்று மணி நேரமாக பேரணியில் வாக்குவாதம், கைது,  போக்குவரத்து பாதிப்பு என பல்வேறு சம்பவங்கள் நடைபெற்றது குறிப்பிடத்தக்கது.