ஆயுத பூஜை: காலை முதல் பூஜைப்பொருட்கள் வாங்க குவிந்த பொதுமக்கள்...

கொரோனா தாக்கத்துக்கு மத்தியில், நாடு முழுவதும் நவராத்திரி விழா கொண்டாடப்படுகிறது. இதன் நிறைவாக ஆயுதபூஜை நாளையும், நாளை மறுநாள் விஜயதசமியும் கொண்டாடப்படுகிறது.

ஒவ்வொருவரும் தாங்கள் ஈடுபட்டுள்ள தொழில் மேலும் துலங்க வேண்டும் என்ற கருத்தின் அடிப்படையில் கொண்டாடப்படும் ஆயுதபூஜை அன்று, மக்கள் தங்கள் வீடுகளை சுத்தம் செய்து, தோரணம் கட்டி, பொரி, பழங்கள் படையலிட்டு வழிபடுவது வழக்கம்.

அந்த வகையில், நாகப்பட்டினம் பெரிய கடை வீதியில் ஆயுதபூஜை கொண்டாட்டத்திற்காக, தோரணங்கள், பழங்கள், பொரி வகைகள் சந்தைகளில் குவிந்துள்ளன.

இதனால் பூஜை பொருட்கள் வாங்க, நாகை, நாகூர் உள்ளிட்ட பகுதிகளில் உள்ள கடைத்தெரு, சந்தைகளில் காலைமுதல் பொதுமக்கள் குவிந்து வருகின்றனர். தமிழகம் முழுவதிலும் பல்வேறு பகுதிகளில் ஆயுத பூஜைக்காக பூஜைப் பொருள்கள் வாங்க பொதுமக்கள் குவிந்தனர். அதனால், வியாபாரிகள் மகிழ்ச்சியடைந்துள்ளனர்.