அன்புமணி மகள் திருமண வரவேற்பு... முதல்வர் ஸ்டாலினுக்கு நேரில் அழைப்பு

பா.ம.க இளைஞரணித் தலைவர் அன்புமணி ராமதாஸ் அவருடைய மகளின் திருமண வரவேற்பு நிகழ்ச்சிக்கு முதல்வர் மு.க.ஸ்டாலினைச் சந்தித்து அழைப்பிதழைக் கொடுத்தார்.

பாட்டாளி மக்கள் கட்சி நிறுவனர் மருத்துவர் ராமதாஸ் - சரஸ்வதி ஆகியோரின் பேத்தியும், பாமக இளைஞரணி தலைவரும் நாடாளுமன்ற உறுப்பினருமான மருத்துவர் அன்புமணி - சௌமியா ஆகியோரின் மகளுமான சங்கமித்ராவுக்கும் சில தினங்களுக்கு முன்னர் சென்னை சோழிங்கநல்லூர் பூ. தனசேகரன், கலைவாணி தனசேகரன் ஆகியோரின் மகன் த. ஷங்கர் பாலாஜிக்கு திருமணம் நடைபெற்றது.

சென்னையில் நடைபெற்ற தனது பேத்தியின் திருமணத்தை மருத்துவர் ராமதாஸ் தலைமை ஏற்று நடத்தி வைத்தார். பாமக தலைவர் ஜி.கே.மணி, முன்னாள் மத்திய அமைச்சர் ஏ.கே.மூர்த்தி, வழக்கறிஞர் பாலு உள்ளிட்ட முக்கிய பிரமுகர்கள் மற்றும் குடும்பத்தினர் இந்த திருமண நிகழ்வில் கலந்துகொண்டனர்.

இந்தநிலையில், தனது மகளின் திருமண வரவேற்பு நிகழ்ச்சிக்கான அழைப்பிதழை முதல்வர் மு.க.ஸ்டாலினைச் சந்தித்து அன்புமணி ராமதாஸ் வழங்கினார். அவருடன் ஜி.கே.மணி, ஏ.கே.மூர்த்தி ஆகியோர் உடனிருந்தனர்.

அன்புமணி ராமதாஸ் கொடுத்த அழைப்பிதழை மு.க.ஸ்டாலின் மகிழ்வுடன் வாங்கிக் கொண்டார்.

பின்னர், இருவரும் சிறிது நேரம் உட்கார்ந்து பரஸ்பரம் நலம் விசாரித்துக்கொண்டனர்.

முன்னதாக, ராமதாஸ் - சரஸ்வதி அவர்களின் இளைய மகள் கவிதா - மருத்துவர் இரா.ஜெயகணேஷ் ஆகியோரின் மூத்த மகன் மருத்துவர் ஜெ. நிதர்ஷனுக்கும், பாட்டாளி மக்கள் கட்சியின் வடக்கு மண்டல இணை செயலாளரும், முன்னாள் தொடர்வண்டித்துறை இணை அமைச்சருமான ஏ.கே.மூர்த்தி - பத்மினிதேவி இணையரின் மகள் ஏ.கே.சமித்ராவுக்கும் கடந்த ஜூலை மாதம் திருமணம் நடைபெற்றது.