எந்த கொம்பாதி கொம்பனாலும் அதிமுகவை அழிக்க முடியாது: ஓ.பி.எஸ்

எந்த கொம்பாதி கொம்பனாலும் அதிமுகவை அழிக்க முடியாது என்று துணை முதலமைச்சர் ஓ.பன்னீர்செல்வம் தெரிவித்துள்ளார். அதற்கு பதிலளிக்கும் வகையில் பேசியுள்ள திமுக தலைவர் மு.க.ஸ்டாலின், அதிமுக அரசை அகற்ற மக்கள் தயாராகி விட்டதாக கூறியுள்ளார்.

தமிழகத்தில் காலியாக உள்ள சூலூர், அரவக்குறிச்சி, திருப்பரங்குன்றம், ஓட்டப்பிடாரம் ஆகிய 4 சட்டப்பேரவை தொகுதிகளுக்கான இடைத்தேர்தல் பிரசாரம் சூடுபிடித்துள்ளது.

திருப்பரங்குன்றம் தொகுதியில் போட்டியிடும் அதிமுக வேட்பாளர் முனியாண்டியை ஆதரித்து மதுரை பெரிய ஆலங்குளத்தில் துணை முதலமைச்சர் ஓ.பன்னீர்செல்வம் வாக்கு சேகரித்தார். அதிமுக அரசின் நலத்திட்டங்களை பட்டியலிட்ட அவர், திமுக ஆட்சியில் செய்த திட்டங்களை வைத்து வாக்கு கேட்காமல், தங்களை குறை சொல்லி ஸ்டாலின் வாக்கு கேட்பதாக குற்றம்சாட்டினார்.

அரவக்குறிச்சி தொகுதியில் வேலம்பாடி, இனுங்கனூர், பள்ளப்பட்டி, ஆண்டிப்பட்டிக்கோட்டை ஆகிய இடங்களில் பிரசாரத்தில் ஈடுபட்ட மு.க.ஸ்டாலின், ஆட்சியில் இருக்க வேண்டும் என்பதை தவிர அதிமுகவினருக்கு வேறு சிந்தனையே இல்லை என குற்றம்சாட்டினார். தேர்தலில் மதசார்பற்ற கூட்டணி மிகப்பெரிய வெற்றியை பெறும் என்றும் அவர் தெரிவித்தார்.

சூலூர் தொகுதி அமமுக வேட்பாளர் சுகுமாரை ஆதரித்து கள்ளப்பாளையத்தில் டிடிவி தினகரன் பிரச்சாரம் செய்தார். அப்போது பேசிய அவர், ஆட்சியாளர்களுக்கு எதிராக மக்கள் உள்ளதாகவும், இதனால் ஆட்சி கவிழ்ந்துவிடும் என்ற பயத்தால், அதிருப்தி எம்.எல்.ஏக்கள் 3 பேருக்கு நோட்டீஸ் வழங்கப்பட்டுள்ளதாக கூறினார்.

திருப்பரங்குன்றம் திமுக வேட்பாளர் டாக்டர் சரவணனை ஆதரித்து 16 கால் மண்டபத்தில் நடைபெற்ற கூட்டத்தில் பேசிய திமுக பொருளாளர் துரைமுருகன், காவல்துறை வாகனத்திலேயே பணத்தை கொண்டு சென்று பட்டுவாடாவில் ஈடுபடுவதற்கு வெட்கப்பட வேண்டும் என்றார்.

இதே போல், மதுரை விளாச்சேரி, நாகமலை புதுக்கோட்டை ஆகிய இடங்களில் திமுக வேட்பாளரை ஆதரித்து பிரசாரம் செய்த மதிமுக பொதுச்செயலாளர் வைகோ, மு.க.ஸ்டாலின் முதலமைச்சரானால், கல்விக்கடன், விவசாயக்கடன் தள்ளுபடி செய்யப்படும், நீட் தேர்வு ரத்து செய்யப்படும் என்றார்.